Nongpoh, Nailar 21: Da ka jingshim khia u MLA ka Mawhati u Bah Charles Marngar ka long shisha ka jingkmen kaba khraw ia ki paidbah nongshong shnong ka Shnong Nongthymmai Makdoh ha ka thaiñ Umsiang, ha kaba ha ka sien kaba nyngkong napdeng ki nongmihkhmat kiba poi ban iuh kjat sha katei ka Shnong ha ryngkat ki kam pynroi.
Kane ka Shnong Nongthymmai Makdoh ka dei ka shnong kaba la iaid lynti la 33 snem naduh la seng ia ka long shnong ka long thaw bad kaba sngewkmen ia ki paidbah nonghshonng shnong ka dei tang u Bah Charles Marngar uba dei u nongmihkhmat ba nyngiong eh ban poi sha katei ka shnong ryngkat ki kam pynroi.
Ha ka 19 tarik u Nailar 2025 u Bah Charles Marngar kum u MLA da lade u leit ban jurip ne iuh kjat ia katei ka shnong, ha kaba la pynlong ia ka jingialang kaba kyrpang ha ïing Dobrar Shnong ban ia kren ne ia tai sani halor shibun ki jngduna kiba dang donkam ha katei ka shnong naduh ka umbam ka umdoh, ka bording ilektrik bad ka surok ba ki paidbah ki kynduh mawsiang ha ka leit ka wan.
Ha kane ka sngi, na ka liang u Bah Charles Marngar namar ka jingbym don ka bording ilektrik ha katei ka shnong, u la aiti da ka Solar Light System kawei ka Balang Katholik bad kawei pat ia ka Balang Presbyterian. Ha katei ka sngi na ka liang u Bah Charles Marngar kumba u la kular ia ki paidbah ia ka jingdonkam ba hakhmat tam kata ka long ka surok ha kaba u la pynioh lyngba ka Border Scheme ban tih shwa tang ka surok khyndew kata na ka Surok Umsiang-Amdubighat ban pyniasoh sha katei ka shnong Nongthymmai Makdoh kaba don kumba 5 km ka jingjngai bad khmih lynti ruh ban sa ioh siang rong ha ki snem ki ban sa wan.
Ha kane ka sngi, u Rangbah Shnong u Bah L. Kasar bad kawei na ka longkmie ruh ki la ai ka jingkhublei kaba haduh katta katta ba dei ha ka jingshah jied u Bah Charles Marngar kum u MLA ba la sdang wan ki kam pynroi ha katei ka shnong Nongkyndong bad kaba don ha khappud ka Assam.
