Nongpoh, Naiwieng 26: Haka jingbteng jong ki pulit ka Ri-Bhoi ban talasi naphang ïaki kali pynkheiñ aiñ khamtam kiba ju mlien ban ñiah kali lem bad u bilor kyiad, ki pulit ka Ri-Bhoi hynnin ka miet hapoh ka jingïalam u Senior Superintendent of Police u VS Rathore, haka jingdonlang u Bah Orville Massar Additional SP hynnin ka miet kila hiar sha ka thaiñ Byrnihat ban pynlong ka jingtalasi lem bad ki dkhot ka Village Defence Party jong ka shnong Lum Nongthymmai Byrnihat.

Katba dang ïaid ka jingtalasi ki pulit ka Ri-Bhoi kila bat ruh ïaka kali u MP ka VPP u Bah Ricky AJ Syngkon katba u dang wanphai na nongbah Delhi, bad kaba kham sngewtynnad shuh shuh ka long ba une u MP u la hiar lang ha katei ka jaka ban ai khublei bad ai mynsiem ïaki pulit ka Ri-Bhoi ban bteng ïa kane ka jingtalasi naka bynta ka jingshngaiñ jong ki paidbah kiba leit ba wan ha shilynter u surokbah National Highway namar ka aiñ kam dei ban noh shilliang haka jingtalasi kampher la ki dei ki VIP ne ki riew paidbah hynrei ban long salonsar ïa baroh.

Haba kren sha ki lad pathai khubor naka liang u Bah Ricky AJ Syngkon u kwah ba kane ka kam bala sdang da ki pulit ka Ri-Bhoi kan treikam ruh ha baroh ki district jong ka jylla khnang ba ki paidbah kin long adkar haba ñiah ïaki kali ban lait na kino kino ki jingjia ba sngewsih

Shuh shuh, u la pynpaw ruh kum u nongmihkhmat paidbah ba ka jingangnud ka long ba ki bor ba pyniaid ia ka ain kim dei ban leh shiliang iano iano ruh la ki de ki VIP ne ki rit ki ria bad kito hi kiba pynkhein ain ki dei ban ngat ha ki kyndon ain namar la shna ia ka ain ba kan treikam solonsar.

Naka liang u Bah Erimus Lamin kum uwei naki dkhot ka VDP jong ka shnong Lum Nongthymmai Byrnihat u la ong kum ka VDP ka ai ka jingïaroh ïaki pulit ka Ri-Bhoi kiba la shimkhia ban talasi naka por shaka por naka bynta ka jingshngaiñ jong ki paidbah bad ban ïatreilang bad ki VDP kumba la sakhi haki por bala leit kila don shibun ki jingjia aksiden tang namar ka jingdih buaid bad lyngba kane ka jinghikai jong ki pulit kan ïarap ïaki paidbah ban don ka jingshngaiñ ha surok bah.