U Myntri Rangbahduh ka ri u Narendra Modi mynta ka sngi U Blei u la iakren bad ka kynhun ialehkai kriket jong ka India lyngba ka phone bad ai khublei ia kane ka kynhun baroh kawei halor ka jingjop jong ka ha ka T20 World Cup 2024 hadien ba kala lah ban pynliem noh ïaka South Africa da 7 ron haka jingïakhun phainal kaba itynnad bad shongshit kaba la long hynnin ka miet ha Barbados.
Lyngba ka phone, u PM Modi u la ai khublei ia u Rohit Sharma halor ka jinglong kapten kaba itynnad, jong u bad u la ai ka jingïaroh ïa ka jingïalehkai jong u ha ka T20. U la ai ka jingïaroh ruh ïa u Virat Kohli halor ka jingïalehkai jong u ha ka phainal bad kumjuh ruh ïa ka jingnoh synñiang jong u ha ka kriket ka India bad kumjuh ruh u Rahul Dravid kum u coach halor ka jinglah jong u ban lamkhmat ïaka ri sha ka jingjop.
Hadien ka jingjop jong ka ri India ïa kane ka T20 World Cup, u Rohit Sharma bad u Virat Kohli ki la pynbna ba kin shongthait noh na ka T20 International, bad ka dei ruh ka dei ka jingïakhun kaba khatduh jong u Rahul Dravid kum u coach ka India.
Naka liang u Modi u la buh ruh ïa ka video ha ka rynsan X jong u hadien ka jingjop jong ka India ha kaba u la ai khublei ïa kane ka kynhun kaba la pynsarong ïa ki 140 klur ki nongshong shnong jong ka ri India.
“Khublei ia ka kynhun ïalehkai ka India na ka bynta kane ka jingjop kaba phylla. Mynta ka sngi, 140 klur ngut ki nongshong shnong ki sngew sarong ia ka jinglehkai ba phylla jong phi. Phi la jop ia ka World Cup bad ruh ia ki dohnud jong ki klur ngut ki nong India. Phim shym la rem wat tang kawei ka jingialehkai bad kane kam dei ka jingleh kaba rit. Nga ai khublei ïa phi,” ong u Modi ha ka ktien Hindi.
