Nongpoh, Jylliew 10: Katba ka jingiakynad hapoh ka jylla Manipur ka dang jur bha kaba la neh mynta la katto katne taiew jong u ne u bnai, kynsan kynsan kawei ka jingjia shah hiar thma ka kynhun ba synran ia u myntri rangbah ka jylla Manipur mynta ka nohphai sngi ha ki kynhun leh noh, ba la suba ba ki dei na sng kieng atiar jong ki Kuki ha kawei ka jaka kaba don ha K. Sanam hapoh ka Jiribam ka District.
U myntri rangbah ka jylla Manipur u N. Biren Singh, u la thmu ban leit jurip sha ka District Jiribam lashai ka 11 tarik Jylliew 2024 da ka helicopter, ban khmih bad ban tohkit kumno ban wanrah biang ia ka shong suk shong shong sain ha kane ka District.
Ha katei ka jingjia shah hiar thma kynsan, ka kynhun kaba bud lang ia u myntri rangbah ka Manipur, u wei u shipai u la mynsaw hadien ba u la shah siat na kjat ia uba la tip kyrteng kum u Moirangthem Ajesh ba khot sin da u Bobo.
Tang mar ia ioh jingtip halor kane ka jingshah hiar thma ka kynhun jong u Myntri Rangbah ka jylla Manipur, mar mar ki shipai bad ki bor pahara ki la hiar sha katei ka jaka ba hiar thma ki lehnoh ban iada ia u N. Biren Singh na kino kino ki jingjia ba sngewsih.
