Ka seng Bharatiya Janata Party haka Meghalaya mynta ka sngi ka la pynlong ia ka jingialang jong ka State Executive Meeting kaba nyngkong hadien ka ilekshon Lok Sabha ha ka ophis jong ka seng kaba don ha Bivar Road ha kaba la wan ban iashim bynta ruh da u George Kurian, myntri khynnah ka sorkar kmie ba dei khmih ia ka tnad Minority Affairs, Animal Husbandry, Fisheries and Dairy, u Rikman G Momin, President jongka BJP ha ka jylla, u Bah A.L. Hek, myntri ka sorkar jylla, u Bah Sanbor Shullai Chairman jong ka MTDC lem bad kiwei kiwei de ki dkhot jong ka Executive Committee.
Ha kane ka jingialang, la iakren halor ki jingthmu bad ki prokram bapher bapher kiba iadei bad ka jingkiew irat bad jingroi jong ka Meghalaya bad ban pynurlong ia ki jingangnud jong ka jylla lyngba ki mat treikam bapher bapher jong ka sorkar pdeng. Ha kane ka jingialang, na ka liang jong u Bah AL Hek u la buh ia ka jingkyrpad ia ka sorkar pdeng lyngba utei u myntri khynnah, ban pynrung noh ia ka ktien Khasi bad Garo ha ka 8th Schedule jong ka riti synshar treikam ka ri da kaba ong ba kane dei ka jingangnud kaba la slem bha jong ki paidbah nongshong shnong ka jylla Meghalaya bad kan iarap ruh bad pynsuk shibun ia ki samla pule bad ruh kan iarap ban ai jingmyntoi ia ki briew lashai lashisngi.
Halor kane ka bynta, na ka liang u George Kurian ruh u la pynpaw ia ki skhim bapher bapher na ka bynta ka Meghalaya kiba la thaw da ka sorkar pdeng hapoh ka jingialam jong u Narendra Modi kum u myntri rangbah. U la ong ruh ba kine ki skhim jong ka sorkar pdeng kan pynbha bad iarap shibun ban kyntiew ia ka kam ri mrad bad ri dohkha ha ka jylla bad ka ban iarap ban kyntiew pat ia ka ioh ka kot jong ki paidbah nongshong shnong kiba don bynta ha kane ka jaidkam.
