Hapdeng ka jingsngewsih kthang, ki paid riewngeit jong ka Balang Catholic ha Ri Lum Garo, mynta ka sngi ki la leit ontep noh ïa u Most Rev. Bishop George Mamalassery, uba dei ruh u Bishop ba nyngkong jong ka Tura.
Shwa ban leit ontep ia utei u Bishop ha ka jaka tep ba kyrpang jong ka Cathedral Parish ha Tura, la don ka jinglehniam kaba naduh mynstep ha Sacred Heart Shrine Tura bad hadien kata pat, ki la leit ban ontep noh ia utei u Bishop hapoh katei ka jaka tep ba kyrpang ia ki riew niam jong ka Balang Catholic.
Ha ka sngi ba la lehniam shwa ban leit ontep ia utei u Bishop, la ïohi ba da ki hajar ngut ki riewngeit ka Balang Catholic, ki la leit ban sngewlem, naduh ki Bishop, ki Phadar lem bad kiwei pat ki nongialam niam ka Balang Catholic.
U Conrad K. Sangma, Myntri Rangbah ka sorkar jylla, nangta u Mukul Sangma lem bad kiwei ki MLA na Ri Lum Garo, ki la leit ban iashimbynta ha ka ban lehniam khatduh ia utei u Bishop.
Khyndiat shaphang u Bishop George Mamalassery, la kha ha ka 22 tarik u Iaiong jong u snem 1932, la pynkyntang kum u Lyngdoh Niam ha ka 24 tarik u Iaiong jong u snem 1960 bad uba la poi sha Ri Lum Garo ha ka 14 tarik u Naitung jong u snem 1960 bad uba la shimti kum u Bishop ka Tura naduh u snem 1979 haduh u snem 2007.
Ka khana ba lyngkot sha u Bishop George Mamalassery, ka pynpaw ba ha ki por ba u poi sha Ri Lum Garo, la ong ba ha kita ki por, ki paidbah ki im hapdeng ka jingjynjar, kata ka dei namar ka jingbym biang ki jaka sumar, ki jaka ai jinghikai lem bad kiwei.
Hadien ba utei u Bishop, u la poi ha Ri Lum Garo, u la ai shisha ia kata ka jingshakri kaba paka, ha kaba nalor kaba u pynleit jingmut ha ki kam shakri Blei, hynrei u dei ruh uba ialeh ban thaw ia ki lad ki lynti kumno ban kyntiew ia ka Ri Lum Garo, la ka long haba iadei bad ki jaka pule, ki jaka ai jingsumar lem bad kiwei ki jingdonkam ki paidbah.
Ha ka jingshakri jong u kum u Bishop, u la lah ban tei ia ki katto katne ki jaka ai jinghikai, ki jaka ai jingsumar ha Tura, ki jaka ban pule Nurse, ki jaka ri ia ki riew tymmen bym don bad sumar bad kiba la long mynta kum ki jaka ai jinghikai bad jaka sumar ba paw ha Ri Lum Garo.
U la shongthait kum u Bishop ha u snem 2007, hynrei watla katta u dei pat uba mlien ban shakri ia ka kam u Blei bad uba ju leit ainguh ai dem ia u Blei ha Holy Cross Hospital Convent. Hadien kata ka jingshitom ka ban ia u bad uba la khlad noh ha ka 5 tarik mynta u Naitung hapoh ka jaka sumar ha Holy Cross Hospital Tura.
Ki nongkren kiba la ai jingkren ha katei ka sngi kaba la lehniam ba khatduh ia u Bishop George Mamalassery, ki la pynpaw ba ka jingkhlad jong utei u Bishop, ka long shisha ka jingduhnong kaba khraw ym tang ia ki paid riewngeit ka Balang Catholic, hynrei ka dei ka jingduhnong ia ka Ri Lum Garo hi baroh kawei, namar u dei uba la noh synniang shikatdei eh ia ki paidbah ha Ri Lum Garo.
