Hadien 14 snem, ba ka Shillong Press Club kala ioh ban pynlong biang ïaka elekshon dang shen ban jied ïa ki nongïalam ba thymmai naduh u President bad Secretary bala bynshet ha u Bah Deimaia L Siangshai bad u Bah Savio Diengdoh mynta ka sngi la ioh pat ban pynlong sa ka elekshon ban jied ïaki dkhot ka Executive Committee (EC) ba thymmai bad pura.
Katei ka elekshon ban jied iaki nongkitkam thymmai ban pynskhem ïa ki nongkitkam jong ka kynhun ki Nongthoh Khubor ka Jylla Meghalaya la sdang naduh 10 baje mynstep haduh 4 baje janmiet ba kynthup ïaka post Vice President, Assistant General Secretary bad ki dkhot ka Executive Committee.
Hadien ka elekshon bad ka jingñiew vote, u Bah Bhabok Laloo u la shah jied kum u Vice President ba thymmai, Bah Samuel Lyngdoh kum u Assistant General Secretary bad 4 ngut ki dkhot ka EC ba kynthup ïa u Bah Wesley Lyngdoh, G. Jarain, James Lyngdoh Nonglait bad ka Kong Ibankyntiew Mawrie.
