Ka HYC, North West Khasi Hills mynta ka sngi ka la kyntu ia baroh ki nongai kam ai jam ha ka jylla la ki dei ki kontraktor ne ki riewshimet, ba ki dei ban phai khmat shuwa sha ki trai muluk ki trai jaka, lada don kino kino ki kam bylla sngi khnang ba kane ka lah ban iada na ka jingwan bsuh khlieh ki bar jylla ha ki kam bylla sngi bapher bapher ha kane ka jylla.
Na ka liang u Nongialam ka HYC North West Khasi Hills District, u Samla Shembor Langrin u la kyntu halor kane ka jingai kam ai jam ia ki trai muluk ki trai jaka, ka dei hadien ba mynta ka sngi, na ka liang ka seng ka la leit ban khynra labour license ia kawei ka jingpyntrei ia ka Residential School ba la tip kum ka JNV ha ka shnong Mawlyntriang bad kaei kaba pynsngewsih ia ka seng ka long ba ym don satia uwei ruh u trai jylla ba trei bylla ha katei ka kam bad la lap pynban haduh haduh 23 ngut ki bar jylla kiba la ioh lad ban bylla sngi ha katei ka kam.
Une u nongialam u la iathuh ruh, ha kane ka jingleit khynra, la lap ia kitei ki 23 ngut ba ki biang ia ki kot ki sla ba kynthup naduh ka Labour License bad ka Adhar card ban pynshisha ba ki dei na ka ri India, hynrei kaei kaba sngewkhia ia ki nongialam ka seng ba ym shym la don satia uwei ruh u trai muluk u trai jaka, uba ioh lad ban leit bylla sngi ha kaba tei ia katei ka Residential School kaba dei ha la ka jong ka jylla.
Namarkata, na ka liang une u nongialam, u la kyntu jur ia baroh ki nongaikam ai jam la ki dei ki kontraktor ne ki riew shimet, haba ki pyntrei ia kano kano ka kam ne ki projek, ki dei ban phai khmat shuwa sha ki trai muluk ki trai jaka na ka bynta ban ai kam ai jam bad kaei ka jingangnud ka seng ka long ban khanglad ia ka jingwan trei bylla ki briew kiba na shabar khnang ba ia ki kam ba dang lah ban trei ki bar jylla kum ki trai muluk ki trai jaka kin ioh lad ruh ban ioh kam ioh jam, u la bynrap.
