Ki nongmihkhmat ka Meghalaya Mineral Land Owners Lease Holders bad ka Exporters, mynta ka sngi ki la pynpaw ba kin ai ka jingkyrshan na bynta ka public hearing kaban sa long ban ia kren na bynta ban sdang biang ia ka jingtih dewiong katkum ka juk saian ba la tip kum ka scientific coal mining ha ka jylla Meghalaya.
Ka Forum, ba la lamkhmat da u President Hamarles Thabah bad Secretary Sharailang Warjri, ki la pdiang ia ka jingshimkhia bad ai jingiaroh ruh halor ka jingtreishitom jong u Myntri Rangbah ka jylla u Conrad Sangma lem bad ki ophisar ban pynkhie im biang ia ka jingtih bad shalan dewiong ha ka jylla kaba dei kawei na kam khaii kaba heh ha ka jylla.
Ka Forum ka la ban khia halor ka jingeh ba la hap mad da ki nongkhaii dewiong, ki kontraktor bad ki nongshong shnong kiba im kamai jakpoh na kane ka kam dewiong naduh ba la khang pyrshah da ka NGT ha u snem 2014.
Kumta, na ka liang ka Forum ka la kyrpad ia ki dkhot bad ki paidbah jong ka West bad South West Khasi Hills District ba kin ia mih paidbah ban wan ia shimbynta ha kane ka public hearing kaban long ha ka 27 tarik Nailar ha Sdad Dkhar, West Khasi Hills District.
