Ki nongñiah kali kamai tourist jong ka jylla Meghalaya bad Assam mynta ka sngi kila lum da ka jingïalang ha Nongpoh ban pynshai sha ki paidbah ha kaba ïadei bad ka jingbat ka HYNF ïaki kali naka jylla Assam kiba wan kamai sha Meghalaya bad ka jingsngewthuh bakla jong ki paidbah bad kum ki nongñiah kali kim don bynta ha katei ka jingpyrshah ïaki kali ba wan na Assam.
Haba kren sha ki lad pathai khubor hadien ka jingïalang naka liang u Bah Tilang nongbet President ka Hynniewtrep Tourist Taxi Association bad u Robbin Dutta President ka Greater Guwahati Tourist Taxi Association, Paltan Bazar kila ong ba katei ka jingïalang ka long kaba seisoh hadien ba ki nongñiah kali kamai na ka jylla Meghalaya bad Assam kila mir jingmut hadien ka jingmih ki khubor ban khang pyrshah ïaki kali ba wan na Assam hynrei kum ka kynhun ki nongñiah tourist kila pynshai ba kam don kum kata hynrei ki nongñiah kali kamai na Meghalaya bad Assam ki don ka jingïatreilang bad kim kwah ban mih kano kano ka huri hura.
Shuh shuh ha kaba ïadei bad ka jingbat ka HNYF kum ka kynhun ki nongñiah kali kim don eiei ban tuklar hynrei ka dei hapdeng jong ki nongïalam ka seng bad ka sorkar ban pynbeit ïa katei ka kam, bad kum ki nongñiah kali ki kwah ba kam kamai jong ki kam dei ban thud bad dei ban long kumba ju long.
Ha kawei pat ka bynta kum ki nongñiah kali kamai kila pynpaw ka jingsngewkhia kaba jur halor ka jingbun ki kali shimet kiba wan ban kamai sha ka jylla Meghalaya kiba la tuh noh ïaka pliang ja jong ki nongñiah kali kamai kiba la hap ban siew ïaki khajna ba heh sha ka sorkar namar ka jingkamai jong ki da ki kali shimet kala wanrah ka jingduhnong kaba khraw ïaki nongñiah kali kamai.
