Ka State Co-ordination Coal, Miners, Dealers and Transporters Association hynne ka sngi kala pynpaw ka jingpyrshah iaka jingbuh kyndon ka Sorkar, ba tang kiba don jaka 100-hectare kin ioh tih dewiong hapoh Meghalaya.
Ka Forum kala dawa naka Sorkar Jylla ban pynkylla iaki kyndon lane ki Standard Operating Procedure (SOP) ban tih dewiong katkum ka juk mynta (Scientific Mining) hapoh Meghalaya.
Haba kren sha ki lad pathai khubor, u dkhot ka Executive Committee (EC) ka Forum u Bah Reginald Shylla ula pyntip ba kane ka jingbuh kyndon ka Sorkar Jylla, ka ktah bha iaki trai jaka kiba don par dewiong.
“Naka liang ka Forum kala thoh sha u Myntri Rangbah ka Jylla haka 2 tarik Naitung 2024 bad ngi la kyntu iaka Sorkar Jylla ban weng noh iaka kyndon ba shah tih dewiong tang kiba don jaka ba heh 100 hectare bad haka juh ka por ban khmih biang iaka SOP” la ong u Bah Reginald.
U Bah Reginald ula pyntip ruh baka Forum kala dawa naka Sorkar Jylla ban thaw daka Expert Committee ban khmih bha biang iaki SOP naka bynta ban sdang tih dewiong daka juk ba mynta (Scientific Mining).
U la iathuh ba shen ka Forum kan pynlong daki prokram ban ialap paidbah haki thain Khasi bad Jaintia Hills ban pynsngewthuh halor ka jingbym iahap ki kyndon lane ki SOP jong ka Sorkar Jylla.
