Ka KSU South West Khasi Hills District bad ka Balat Border Area Circle kala pynpaw ka jingsngewkhia kaba jur bad ka jingsngew lyngngoh halor ka jingioh lad ki ki khar Bangla ban kiew shaduh u pud u sam ka ri India haka thaiñ Dangar ban wan kit maw bad kynnoh ruh ba ki shipai BSF kiba don ha Dangar Border Out Post kim shym la leh eiei bad ailad ïa kitei ki khar Bangla ban kit maw da ki lieng kumba ki video kila saphriang halor katei ka jingtuid ki khar Bangla ha katei ka jaka ban wan lum maw.
Haba phah ïaka kyrwoh naka liang ka seng kala pynpaw ba kane ka pyni ba imat ka lah ban don ka jingiasngewthuh jingmut hapdeng ki shipai iada khappud (BSF) bad ki khar Bangladesh. Kane kan buh jingma ïaka jaitbynriew jong ngi namar lada ka paw kumne khlem pep kane kan pynsuk ruh ïaki bym dei ki nong India ban shim ïa kine ki ktem shipai kum ki jaka rung tuh ha kaba na kine ki jaka ki nongwei kin kiew bad leit buhai shnong sha kiwei kiwei ki jaka jong ka bri u Hynniewtrep.
Namarkata ka seng ka dawa naki bor District jong ka East Khasi Hills District bad kumjuh ruh jong ka South West Khasi Hills District ba ki dei ban tuklar mardor halor kane lem kumta naka liang ka seng kam banse ban hiar hi sha katei ka thaiñ ban shim ïa ki sienjam ba ki khar Bangla kim dei ban rung shaduh u pud u sam ka ri India ban wan kit maw.
