Ka jingpang khlam jong ki sniang ba la tip kum ka African Swine Fever ka la sar naphang hapoh ka jylla Mizoram ha kaba ka jingiap jong ki sniang ka la nang kiew bad wanrah ia ka jingduhnong kaba khraw ia ki nongshong shnong kiba im jakpoh da kaba ri ne die ia ki sniang ha kane ka jylla.
Katkum ka kaiphod ba la iohlum, naduh ba la sdang kane ka jingpang khlam kata naduh u snem 2021 ba la sdang na ka shnong Lungsen, Lunglei District, ka jingiap jong ki sniang ka la kot haduh 48,437 bad kane ka khlam ka la pur ruh sha ki 27,056 tylli ki sniang bad ka jingduhnong tad haduh kine ki sngi hapdeng ki nongri sniang ka la kot sha ka 589.67 klur tyngka.
Kane ka jingpang khlam hapdeng ki sniang ka la sdang sar ruh ha katei ka jylla Mizoram naduh u snem 2019 terter, ha kaba ki bor sorkar ka jylla Mizoram, ki la hap ban shimkhia ban pyrkhing ia ka jingwanrah ia ki sniang kiba nabar ka jylla, watla hapdeng ka jingtreishitom jong ki bor ka sorkar Mizoram, hynrei kane ka jingpang ka la nang iai bteng ban pur kaba la pynduhnong shikatdei ia ka iew ka hat ha kaba ia dei bad ka jingdie ia ka dohsniang ha kane ka jylla bad ktah ruh ia ka ioh ka kot jong ki nongrep kiba im jakpoh da kaba ri bad die dohsniang khamtam ha ki shnong nongkyndong.
Kane ka jingpang khlam jong ki sniang, ka la ktah bun tylli ki shnong ka jylla Mizoram bad pynduhnong shikatdei ia ka ioh ka kot jong ki nongri jingri bad katkum ka kaiphod jong ka tnad Economics ha ka Pachhunga University College, Mizoram la lap ba haduh 24% na ki nongri sniang ki la sangeh syndon ban ri ia ki sniang, 20% na ki nongri sniang kim lah shuh ban pynbit pynbiang ia ki jingsumar ia ki sniang kiba kem pang bad 19% ki la hap ban pynsangeh noh wat ia ka jingphah skul ia la ki khun ki kti bad khatduh kumba 8.3% na ki nongshong shnong ki la hap ban pynsangeh shipor ia ka jingtei pyndep ia la ki iing ki sem tang namar ka jinghiran ka ioh ka kot na ka jinghiran kaba la mih na ka jingpang khlam ki sniang.
La ioh jingtip ruh, ba ka jinglong jingman hapoh Mizoram ka la nang hiran bha dei ha u ne u snem 2024, ha kaba katkum ka tnad sorkar Mizoram ka la pyntip ba ka Aizawl kaba dei ka nongbah ka la shah ktah bha ha kaba haduh 3,700 ki longing ki la shah ktah bad ka jingduhnong ka la kot haduh 160 crores. Na ka liang ka sorkar jylla Mizoram ka la mang tyngka ruh kumba 60.21 lakh ban iakhun ia kane ka jingpang khlam jong ki sniang.
