Ki shipai jong ka 193 Bn, ka Border Security Force mynta ka sngi, ki la lum la lang ia baroh ki nongialam shnong jong ki shnong khappud bad ka ri Bangladesh ha ka jingialang kaba la pynlong ha ka Border Outpost ha Dangar ha ka iadon ryngkat u MLA ka Mawsynram, u Bah Ollan Singh Sun.
Ka jingpynlong ia kane ka jingialang hapdeng ki shipai BSF hapoh ka jingialam jong u Rajiv Kumar, Commandant ka 193 Bn lem bad ki nongialam shnong ka thain ka long ban pynshai sha ki paidbah nongshong shnong halor ka jinglong jingman hapoh ka ri Bangladesh kaba la buh jingma ruh khamtam ha shnong khappud na ka jingwanrung tuh jong ki nong Bangladesh kiba la phet rieh ialade na ki jingia umsnam hapoh katei ka ri.
Halor kane ka bynta, kumba ka shongsuk shongsain hapoh katei ka ri kam pat don bad ki dang mih shibun ki jingshah lehbein khamtam pyrshah ia ki kynhun rit paid, ki shipai BSF ki la kyntu ia ki nongialam shnong ba kin ai ia ka jingiatreilang kaba pura khnang ba ki khappud kin long kiba skhem bad ki briew na katei ka ri, kin nym ioh ban rung laitlain shapoh ka ri India lyngba kitei ki shnong khappud.
