U Myntri Rangbah ka jylla u Conrad K Sangma mynta ka sngi u la leit ban buh mawnongrim ban tei ïaka Organic Spice Industrial Unit (Prime Hub) jong ka Eastern Ri Bhoi Organic Farmer Producer Company Ltd ha Bhoirymbong bala mang pisa kumba 16 klur ban iarap bad kyrshan ïaki nongrep.
Ha katei ka sngi la wan ruh ban sakhi da u Bah Damanbait Lamare MLA ka Umroi, u A Baranwal Deputy Commissioner ka Ri Bhoi, u Jagpal Singh Dhanao Superintendent of Police ka Ri Bhoi ki ophisar naka tnad ka rep ka riang bad kiwei kiwei.
Haba kren ha katei ka sngi u Conrad K. Sangma u la ong ba ka sorkar ka kwah ban ïarap ia ki nongrep, bad ban pynbun ia ki Food Processing Unit haka jylla bad kumba ka long mynta, ki la lah ban buh ha Nongpoh, ha Jaintia ha Trikilla, Rongmora lem bad ha kiwei ki jaka, bad lyngba kitei ki food processing unit kan long ka jingkyrkhu bad ka jingmyntoi kaba khraw iaki nongrep.
“Ngi kmen eh halor kane ka project ha Bhoirymbong bad kyntu ia ki paidbah nongrep ba kin pyndonkam ha kata ka rukom kaba dei khnang ba kan long ka jingmyntoi ia ki bad kan kyntu ia ka kamrep ha ka jylla hi baroh kawei bad kitbok ba katei ka food processing unit bad kan long kaba ïaid beit bad ba kan ai jingmyntoi ia ki paidbah haka thaiñ Umroi” la ong u Conrad.
U ai ruh ka jingiaroh ia u MLA ka Umroi u ba la pynbor ia ka sorkar jylla, ba ba ka thaiñ Umroi ka dei ban don kawei ka food processing unit bad kane ka jingkwah bad ka jingthrang jong ki nongrep kala urlong mynta ka sngi bad shen yn sa sdang ban tei noh ïa katei ka industrial unit.
