Hadien ka jingbteng ka jingkynad haka ri Bangladesh, ka jingwan phai jong ki briew lyngba ka Dawki ICP kala nang bteng ha kaba mynta ka sngi ki don kumba 204 ngut ki nong India bad kynthup 13 ngut na Meghalaya, 158 na ka ri Nepal bad 1 na Bhutan.
Kum ban shu kdew ba ka jingkynad hapdeng ki samla pule haka ri Bangladesh bad ka sorkar kala nang jur bad da ki phew ngut ki mynsiem kila duh noh ïala ka jingim bad mynsaw hadien ba ka sorkar Bangladesh kala rai ban ai biang ïaka bhah thungkam ba 30% sha ki nonghiar pateng jong ki riew ïaleh laitluid ka ri naduh u snem 1971 haka thma pyrshah ïaka Pakistan.
Naka liang u Bah Hiwot Rymbai Nodal Officer ba peit ïaka khappud Dawki bad ka Bangladesh u la pyntip ba haduh mynta ki samla kiba wanphai lyngba ka Dawki ICP kila wanphai suk lyngba katei ka jaka bad kam don kano kano ka jingeh ïaki samla bad naka liang ka tnad pulit kila ïaleh katba lah ban ïarap ïa kiba wanphai na katei ka jaka.
