Hadien ka jingiaksaid ka KSU ban khynra ia ka work permit na ki nongtrei bar jylla, ka sorkar ka la pyrshang ban pyntieng ia ki dkhot ka KSU da kaba phah ia ki pulit ban leit khynra shiteng miet ia uwei u nongialam ka KSU, u Samla Eric A Nongkynrih bad ruh ban phah khot hajir haduh 29 ngut ki dkhot ka seng na kylleng ka Bri U Hynñiewtrep. Hynrei kine ki jingpyrshang ban theh umpjah bad pyntieng ia ka KSU kim shym la seisoh ha kaba ki dkhot ka KSU pynban ki dang pynjur shuh shuh ki jingkhynra wat haduh mynmiet ha kaba la sakhi ba la ioh kem ia ki mynder ba thmu rung ruh sha jylla da kaba rieh ha ki trok dumper.
Ka jingpyneh triang ka KSU ka la pynlong ia u Myntri rangbah ka jylla ban khot ia kren ia ka KSU ha ka 19 tarik u Naitung 2024. Ha kane ka jingiathir, u Myntri rangbah u la ong ba ka la don ka aiñ ban teh lakam ia ka jingbuhai shnong da ki nongtrei bar jylla kaba tip kum ka Meghalaya Identification Resgistration (Safety & Security) of Migrant Workers Act 2020, hynrei ka KSU ka la pynphai ktien ba katei ka aiñ ka long kaba tlot bad ka bym don bniat haei haei ruh ban khanglad ia ka jingwan buhai shnong ki mynder. Ki nongialam ka KSU ki la pynsngew ba ki kyndon ka Inter-State Migrant Workmen Rules 2011 ki kham khlaiñ ban ia katei ka aiñ.
Hadien ka jingiathir kaba slem ka KSU ka dawa ban pynrung noh katto katne ki aiñ ka Inter-State Migrant Workmen Rules 2011 ha ka Meghalaya Identification Resgistration (Safety & Security) of Migrant Workers Act kaba kynthup ia kine harum:
- Police verification of migrant labourers from their place of origin as a document for registration. 2. The penalty of a fine of 5000 INR to be replaced by imprisonment for the violating contractor.
Hadien kane ka jingiakren, ka sorkar ha ka 2 tarik u Nailar 2024 ka la pynkylla ia ki rules jong ka Meghalaya Identification Resgistration (Safety & Security) of Migrant Workers ha kaba la pynrung ia ka police verification kum ka kot ba donkam bad ban pyndonkam ia ka Crime & Criminal Tracking Network pyrshah ia ki nongtrei bar jylla. Kumjuh ruh ka cabinet ka la kular ban rah ruh sha Assembly ia ka jingpynshitom ia ki contractor ba pynkheiñ ia ka aiñ da kaba daiñ kuna 1 lak tyngka bad lada ki iai pynkheiñ ia kane ka aiñ ki shah set along kumba 3 bnai.
Ka KSU ka ngeit skhem ba baroh ki nongmihkhmat ki pdiang ia kitei ki jingtyrwa bad pyntip ruh ba ka seng kan pdiang ia kitei ki jingtyrwa ka sorkar tangba wat hadien ka jingpyntrei kam ia kitei ki kyndon ka KSU kan hap iai peit pyrman ioh katei ka aiñ ka shu kut tang ha ki kot ki sla bad yn ym treikam ha madan. Ka KSU kan pynthikna ba kitei ki kyndon kin hap treikam pura bad ki labour inspector kin hap talasi na ka por sha ka por lym kumta ka KSU kan hap biang ban leh da kaba tyngeh.
Khatduh, ka KSU ka ban biang sa shisien ia ka GoM bad GoI ba ki mat kum ka MRSSA bad ILP ki dang sahteng, bad katba kine ki dang sahteng, ki dkhot ka KSU kin iai long beit ki nongpyntreikam ia la ka jong ka MRSSA bad ILP. Kane ka long katkum ka kyrwoh ba la phah da u Samla Lambokstarwell Marngar President ka KSU bad u General Secretary ka KSU u Samla Donald Thabah.
