Naduh ki bor nongialam shnong bad ki nongrep jong ki san tylli ki longing ba shah ktah ki la kynnoh ba ka KHADC ka la thombor da kaba wan ban pynjot ia ki jingthung jingtep ha ka sngi Saitjain bad kane ka jingleh ka KHADC lyngba ka Beat House Lailad ka la ktah shisha ia ki nongrep kiba don ki jingthung jingtep ba la shah pynjulor naphang ha ka KHADC.
Kane ka jingwan pynjulor ka KHADC ia ki jingthung jingtep lyngba ki nongtrei jongka ha Beat House Lailad ka la ka ktah shisha ia kitei ki nongrep kiba la im jakpoh na ka kam rep, namar baroh ki jingthung jingtep ki la pom naphang ha kaba ka la wan rah ka jingjulor kaba khraw ia kitei ki nongrep.
Kitei ki 5 tylli ki longing ba la shah ktah ha kane ka jingshah pynjulor ki jingthung jingtep ki kynthup ia ka ing jong ka kong Prin Umsong, ka kong Brina Sylliang,ka kong Slis Lyngdoh, ka kong Ormilis Lapang, bad ka kong Phiarnes Sylliang. Ki jingthung jingtep ba la shah pynjulor ki kynthup nadu ka Kait, u Sohtrun, u kwai, u Sohniamtra bad kiwei kiwei ki mar rep ba la rep shitom da kitei ki nongrep.
Na ka liang kitei ki nongrep ba la shah ktah, ki la iathuh ba ki briew jong ka KHADC ki la wan ban pynjot bad pom naphang ia kitei ki jingthung jingtep, ka dei kab ki khlem pyntip satia ia ki kum kita ki nongrep bad ha ka sngi Saitjain ki la wan rah da ki kor ki bor ban pom naphang ia ki jingthung jingtep jongki.
Na ka liang kine ki nongrep ba la shah ktah jur, ki la pynrem jur ia ka KHADC ba kane ka jingwan pynjot ia ki jingthung jingtep ka la wan rah ka jingduhnong kaba khraw ia ki kum kita ki nongrep kiba im jakpoh na ka kam rep ka kam riang.
U Rangbah shnong ka Shnong Umladoh, u Bah Wet Syngkli, ha kaba ia dei bad kane ka jingjia u la pynrem jur ia kane ka jingleh donbor ka KHADC kaba la wan ban pynjot lut ia ki jingthung jingtep bad khlem da pyntip ruh sha ka bor shnong, ha kaba kane ka kam ka dei kaba la shu thombor khlem da pyrkhat satia ia ka jingshah ktah ki nongrep.
Shuh shuh, u la ong ruh ba ka liang ka shnong kam lah satia ban pdiang ia kine ki kam thombor ka KHADC ha kaba shuwa ban leh ia kane ka kam ka la dei ban ia pynbeit shuwa bad ki bor nongialam shnong bad ka long pat kaba sngewlyngoh khlem don jingsngew ka la wan banpynjot naphang ia ki jingthung jingtep kaba la ktah jur ia ki nongrep ba im jakpoh bad ba kyrshan ia ka ing ka sem lyngba ka kam rep ka kam riang.
Shuh shuh, u la ong ruh ba na ka liang ka shnong ka la kyrpad ia ka sorkar ba ka dei ban tuklar ia ane ka kam thombor ka KHADC bad kum ki nongrep ba la shah ktah jur ki dei ban ioh ia ka hok, na ka bynta ban pynlong ia ka jingtohkit kaba bniah halor kine ki kam thombor ka KHADC, u la bynrap.
