Mumbai, Jylliew 11: U Symbud Myntri Rangbah ka Maharashtra, u Eknath Shinde, u la bthah ïa ki pulit ban register da ka mukotduma “thmu pynïap” pyrshah ïa uwei u nongñiah taksi hadien ba ka durkhih kaba pyni ïa ka jingthombor jong u ïa uwei u tymmen ka la saphriang paidbah ha ki social media.
Katkum ki jingïoh lum khubor, kane ka jingjia ka la jia haka 9 tarik u Jylliew haka por kumba 7 baje eiei hajan ka Jupiter Hospital ha Thane, ha kaba utei u tymmen u la pynpaw ïa ka jingbym sngewtynnad jong u halor ka jingbiah klumar jong utei u nongñiah taksi. Ka jingïakajia kaba sdang tang da ka ktien ka la kylla long ka jingïakynad kaba jur, bad la kynnoh ba utei u nongñiah taksi u la shoh la dat ïa utei u tymmen.
La ong ba na kane ka jingthombor, utei u tymmen u la mynsaw jur bad kdiah haki bynta jong ka kjat. Ka durkhih jong kane ka jingjia ka la saphriang sted ha ki lad pathai social media bad ka la pynmih ïa ka jingbitar jongki paidbah.
Ki khubor ki ïathuh ruh ba ki nongïalam naka liang jong ka Shiv Sena ki la ïatreilang ban wad bad kem ïa utei u nongñiah taksi. Hadien ba la lap ïa u, la aiti noh sha ki pulit ka Vartak Nagar Police Station ban leh ïa kaba donkam katkum ka aiñ.
Ki pulit mynta ki dang pynlong ïa ka jingtohkit kaba bniah halor kane ka jingjia, katba ka sorkar jylla ka la pynpaw ba kan ym ailad ïa kino kino ki jait jingthombor pyrshah ïa ki tymmen ki kro lane kino kino ki nongshong shnong.
Sa peit ruh
