Nongpoh, Nailar 20: Ka jingshah kem ki 5 ngut ki nongialam ne ki dkhot ka Hynniewtrep National Youth Movement (HNYM) halor ka kam dawa pisa na ki Kali ba kit ia ki Tourist kam dei satia ba la pynpaw tang ha ka ejehar ba la ujor sha ki Pulit ka Ri Bhoi, hynrei ki pulit ki la ioh ruh wat ia ki sakhi ki satar kiba paka ba kitei kito Kali ba kit ia ki Tourist ki la phah pisa lyngba ki Bank Transaction ba kim don pisa ia ka pisa plieh ban siew ia kine ki nongdawa pisa.
Ia kane ka la pynpaw ruh ha ka kyrwoh ba la phah da u senior Superintendent of Police ka Ri Bhoi, ba ka jingkem ia kitei ki 5 ngut ki dkhot ne ki nongialam ka HNYM kam dei satia tang ba ki la ioh pdiang ia ka ejehar ba la ujor sha ki pulit bad ki la lap ruh wat ia ki sakhi satar ba kito kiba shah dawa pisa ki la phah pisa lyngba ki Bank Transaction kaba kim lah ban len ne burieh.
Kum ban pynkynmaw, kitei ki 5 ngut ki dkhot ka HNYM kiba la shah kem halor ka kam dawa pisa, ki kynthup ha ka jingialam u Sparly Syngkli kum u Chairman ka Anti Influx Cell, u. Donboklang Kharbani President Nongpoh Circle, u Aiborlang Marbaniang Working President Nongpoh Circle, u Krius Pariong kum u member bad u Ricky Tangsang kum u member.
Ka kyrwoh na ki Pulit ka ong ba wat kitei ki briew kiba na shabar ka jylla ki don ia ki kot ki sla kiba paka shuwa ban rung sha ka jylla bad la dep ruh ban bishar bniah na ka Infiltration Check Gate ha Byrnihat.
Ki pulit ki la dep ruh ban register case ia kitei ki 5 ngut ha ki kyndon ain bapher bapher halor katei ka kam dawa pisa bad la pynpaw ruh ha kane ka kyrwoh, ba u Ricky Tangsang u dei uwei uba la shah register case halor ki kam tuh bd ki kam dawa pisa la bun tylli ki case ba kynthup ha Nongpoh Police Station, Umiam Police Station bad Laban Police Station ba la pyngngat kyndon ain bapher bapher.
La ong ruh ba kitei ki dkhot ka HNYM ym tang ba ki la dawa pisa, ki la bom la shoh ruh ia ki Tourist bad kane ka la buh jingma ruh ia ki dribar tourist bad wat ki nongleit nongwan kiba na shabar kiba wan sha kane ka jylla.
