Shillong, Nailar 20: Ka Northeast United, ka la pynthikna ïalade ban rung sha ka phainal ha ka 134th edition ka Durand Cup bad kata ka dei hadien ba ka la lah ban pynliem noh ia ka Shillong Lajong da 1-0, lyngba ka kol kaba la thep da u Radeem Tlang ha ka minit ba 36 ka kylla step jong ka jingiakhun.
Ha ka jingiakhun Semi Final hapdeng ka Shillong Lajong pyrshah ia ka Northeast United, kaba la long ha madan JN Stadium, Shillong, ka dei ruh ka jingiakhun kaba la tip kum ka Northeast Derby, ha kaba katei ka jingiakhun ka dei kaba shongshit bad khamtam ki nongkyrshan ia ka Shillong Lajong, kiba la kyrshan tyngeh, namar ba ia katei ka kynhun la mihkhmat bun da ki rangialehkai kiba dei ki Khasi.
Haba phai sha ka jingiakhun Semi Final hapdeng ka Shillong Lajong pyrshah ia ka Northeast United, ka dei kata ka jingiakhun kaba iakhaid bad itynnad bha, ha kaba la ïohi ba ki rangialehkai ka Shillong Lajong, kiba bun ki dei ki samla Khasi, ki la iakhun tyngeh bad pyni shisha ia kata ka sap ka phong ba ki don, kata hakhmat ki rangialehkai ka Northeast United, kiba dei ki rangialehkai kiba la kham ïoh ka jinghikai ba biang bad ïoh ban iakhun ha ka lympung ialehkai ka Indian Super League.
