Shillong, Jylliew 18: Ka jinghap ka Liengsuiñ Air India ha ka 12 tarik u Jylliew 2025 ha Amedabad, ka la dei shisha kawei na ka jingjia kaba kaba sngewsih tam bad kaba la pynïam briew shuh shuh, ka dei ka jingduh noh ïa la ka jingim na kawei ka longïing ki Doctor ba kynthup naduh u kpa, ka kmie bad 3 ngut ki khun ba dangrit, ha kaba hapdeng ka jingkmen jingsngewbha shi khun bad la u kpa ka kkmie ki hap ban mad ïa katei ka jingjia kaba khlem poi pyrhat haduh ban da duh syndon ïa la ka jingim.
Kum ban pynkynmaw, kane ka Longïing kaba la mad ïa kane ka jingjia ba sngewsih tam, ka dei ka longïing jong u Dr. Prateek Joshi, ka kurim jong u, ka Dr. Kaumi Vyas bad ka khun ka Miraya ba dang 8 snem ka rta bad 2 ngut kiba dei ki khun synrap shynrang u Pradyut bad u Nakul.
Kane ka jingjia ka bym poi pyrkhat bad kaba ym lah ban mut dur, ka dei ka jingthmu kine ki shi kurim u Dr. Pateek Joshi bad ka Dr. Kaumi Vyas ryngkat ki khun ban ïa sah ryngkat noh sha London bad la u kpa, hynrei u lyoh badum u la wan tap ha ka 12 tarik u Jylliew 2025 ba katei ka Liengsuiñ kaba ki shong ban leit sha London ka la hap bad bthei noh haduh ba ki la duh syndon ïa la ka jingim baroh shi ïing shi sem.
Kaba kham sngewsih ruh, u Dr. Prateek Joshi, u dei u Doctor ba la tip kum u Radiologist bad ka kurim jong u, ka dei ka doctor Pathologist, kaba la iehnoh kam noh na Hospital ha Rajasthan, India ban leit sah bad la u kurim sha UK ryngkat bad la ki khun bad kane ka jingjia ba sngewsih ka la jia hadien ka jinghap bad ka jingbthei ka Liengsuiñ Air India ha Ahmedabad.
Lyngba ki dur ki dar, la iohi ba shuwa ba ka Liengsuiñ kan her ban leit sha London, la iohi ruh naduh u kpa, ka kmie bad la ki khun ki la ïa shon dur lang hapoh katei ka Liengsuiñ bad ym lah ban murdur hapdeng ka jingkmen kaba ym lah ban batai ka wan hap pat katei ka lanot kaba ki la duh syndon baroh ïa la ka jingim.
Kumba la paw ha ki lad pathai khubor, katei ka longïing ka dei ka longïing kaba shongsuk shongsaiñ bad ka dei ka longïing kaba dap da ka jingkmen bad ka long pat ka khubor kaba ym lah ban mut dur kumno kane ka jingjia ka wan jia wan hap kaba ym lah shuh ban batai haduh katno ka jingkthang jong ka ing ka sem jongki, ha kaba ha ka shi kyllipmat ki la duh haduh 5 ngut ki mynsiem ba kordor ba kynthup ïa u kpa, ka kmie bad 3 ngut ki khun.
