New Delhi, Jylliew 21: Ha ka jingiaid lynti jong ka mukotduma jong ka Excise Policy ha kaba la kynnoh ia u Myntri Rangbah ka jylla Delhi u Arvind Kejriwal ba u la donkti ha ka kam bamsap ha kane ka kam, dang shen ki bor ka ED ki la kiew bad pan jingiarap na ka Delhi High Court ban iakhun pyrshah ia ka jingai jamin jong ka Trial’s Court ia u tei u Myntri Rangbah ka Delhi.
Katkum ka khubor ba dang shu ioh, la iathuh, ba ka Delhi High Court mynta ka sngi, ka la pynbna ba dang shen ka order jong ka trial court yn pynap shwa tad ynda ka Court kan khmieh bniah ia kane ka mukotduma pyrshah ia u Myntri Rangbah ka Delhi u Arvind Kejriwal.
Kane ka sienjam jong ka Delhi HC, ka la mih ruh hadien ba ki bor jong ka Enforcement Directorate (ED) ka la kiew sha ka High Court ban pyrshah ia ka jingai jamin ia u Arwind Kejriwal halor ka jingkynnoh donkti u MR ka Delhi ban bamsap lyngba ka tnad Excise.
Balei u MR ka DELHI u don hapoh Patok? Lah ban kdew ba ha ki 3 bnai ba la dep, u Kejriwal u la shah kem ha ki bor ka ED halor ka jingkynnoh donkti u MR ban bamsap ha ka tnad Excise Delhi katkum ka Delhi excise policy ba la lap lang da ki bor ka CBI. La set ia u Kejriwal Tihar Jail hadien ba u la shah kem ha ka 21 tarik u Lber 2024 hynrei u la ioh ban mih na kane ka jail hadien ba u la ioh jamin ha u bnai ba la dep katkum ka interim bail ban aireng ha ka election Lok Sabha elections bad u la pyndem biang ialade ha ka 2 tarik Jylliew ban leit shong patok biang.
Kaei kane ka mukotduma pyrshah ia u Kejriwal? Ki bor ka ED dang shen ki la kynnoh ba u Kejriwal u donkti ban pynkylla ia ka Delhi excise policy ia kaba la dep ban pynduh noh hadien ba la dep pynbit pynbiang, “kaba la sngewthuh ba kane ka shah liang beit bad ka ‘South Group’ pyntikna ki bor ka ED”, “kaba pynskhem khlem kano kano ka jingpynwit, na bynta ban ioh ia ka hok ban sdang ne leh ia ka wholesale businesses, retail zones, ha kaba la kynnoh ruh ba la siew 100 crore tyngka sha u ne u heh nongialam ka AAP halor katei ka kam.
SNGAP JAR KA DELHI HC, IA KA ORDER AI JAMIN KA TRIAL COURT’S PYRSHAH IA U ARVIND KEJRIWAL HALOR KA MUKOTDUMA EXCISE POLICY
