Mawsynram, Jymmang 28: U Dr. DRL Nonglait kum u kyrtong ka NPP ha kane ka MP election shiteng samoi haba leit ban ialap election mynta ka sngi ha Mawsynram, u la phla sha ki paidbah ba ma u ruh kum uwei u riew rangbah u la dei u dkhot Task Force ban thaw ia ka Education Policy ha u snem 2018 hadien ba la synshar da ka sorkar MDA ha ka jylla.
U la ong ruh haduh mynta ka jylla Meghalaya ka dang pyndonkam ia ka education Policy ka jylla Assam ba ka jylla Meghalaya kam pat don la ka jong ka Education Policy bad dei ha ka jingsynshar ka sorkar MDA ba lamkhmat da ka NPP party la sdang ban thaw ia ka Education Policy ha u snem 2028 kaba ma u ruh u long kum u dkhot ban ia saindur lang ia kata ka education Policy ban kyntiew ia ka jingnang jingstad hapoh ka jylla.
“Lyngba kane ka Education Policy ba la wan rah da kane ka sorkar MDA kum u dkhot u la ai shibun ki jingmut ban saindur ia ka pule ka puthi bad ka jingnang jingstad bad nalor kata u la ai jingmut ruh khamtam ban ia pyrkhat kyrpang ia ka Fees Structure naduh ki Klas ki barit shaduh ki kyrdan kiba heh khnang ban kot bor ki samla pule” ong u Dr. Nonglait.
U la ong ruh ka jingpdiang jong u ban iakhun kum u kyrtong ka NPP kam dei satia ba u pyrkhat ban myntoi ia lade shimet, hynrei ki don shibun ki mat ki jura kiba u kwah ban iakhun lada ki paidbah ki kloi ban pynjop kum u MP ka Shillong ha kaba un trei ryngkat bad u Myntri rangbah, ki myntri sorkar ban ia said na ka bynta ka jingdonkam ki paidbah ha ka jylla kum ka Ktien Khasi kaba la long ka mat kaba hakmat eh ban ithuh noh ka sorkar kmie da kaba pynrung ha ka khyrnit ba phra ka riti synshar ka ri.
Shuh shuh, ha kane ka sngi na ka liang u Dr. DRL Nonglait u la pan ka jingkyrshan na ki paidbah ka thain Mawsynra ban kyrshan borbah ban pynjop ia u khnang ba un lah ban pynurlong ia shibun ki jingangnud kiba u kwah ban kyntiew na ka bynta ka jaid bynriew bad khamtam u la pynpaw ruh ba u don ka jingieit kaba kyrpang ia ka thain Mawsynram ba u la shakri ha kate ka thain kum uta u Nonghikai Kolej, u la bynrap.
Sa Peit Ruh