Nongpoh, Jymmang 28: Uwei u heprit uba dang 11 snem ka rta ula duh noh ïa la ka jingim hadien ba kawei ka kali Bolero Pickup kaba don ïa u registration number ML-05-U-4961 ka la leit tynrah ïa u hynne ka step ha shnong Warmawsaw.
Katkum ki jingïoh lum jingtip, ïa katei ka kali la ñiah da u Taidan Makri. La kynnoh ba utei u nongñiah ïa katei ka kali Pickup ula don hapdeng ka jingbuaid kyiad bad namar ka jingñiah sted palat ïa ka kali, kaba la pynlong ïa ka jingjia kaba sngewsih.
La ong ba katei ka jingjia ka la jia ha ka por kumba 9 baje mynstep. Mar mar hadien ka jingjia, la pynkit noh ïa utei u heprit sha Patharkhmah CHC na ka bynta ban pynioh jingsumar, hynrei namar ka jingmynsaw jur utei u heprit u la duh noh ia la ka jingim.
Ïa utei u heprit la tip kyrteng kum u Ferdinel Wahlang, uba dang pule ha ka klas 5 ha Brensly Secondary School, Warmawsaw.
Na ka liang ki nongïalam jong ki sengbhalang kiba kynthup ïa ka HNYF, KSU bad FKJGP jong katei ka thaiñ, kiba la leit synran lang ïa ki bahaïing hasem sha CHC, ki la pynrem jur ïa ka rukom ñiah torti jong u nongñiah katei ka kali. Ki la ong ba ka jingbym phikir haba ñiah kali ka la wanrah ïa kane ka jingduhnong kaba khraw ïa ka longïing jong utei u Heprit.
Ki nongïalam sengbhalang ki la kynnoh ruh ba utei u nongñiah ula don hapdeng ka jingshoh khawiang bad la suba ruh ba um pat don ïa ka licence ñiah kali kaba biang.
Halor kane, ki sengbhalang ki la dawa na ki bor ka aiñ ba kin pynshitom tyngeh ïa u nongñiah katei ka kali katkum ki kyndon jong ka aiñ.
Shuh shuh, ki la kyntu ïa ki Pulit jong ka Patharkhmah Police Station ba kin pynjur ïa ka jingkhynra pyrshah ïa ki kali kiba ñiah sted, kiba ñiah khlem akor bad ruh ïa ki nongñiah arshaka, khnang ban lah tehlakam ïa kum kine ki jingjia kiba sngewsih.
Sa peit ruh
