Nongpoh Rymphang 9:  Ka Meghalaya State Disaster Management Authority (MSDMA) bad ka District Disaster Management Authority (DDMA) ha ryngkat ka jingiatre lang bad ka tnad Revenue & Disaster Management lem bad ka National Disaster Management Authority (NDMA) mynta ka sngi ki la pynlong da ka prokram ai jinghikai ia ki padibah halor ki lad ki lynti ban shim iaka jingiada lada wan kynsan ka jinglynshop ka bor mariang ne u jumai.

Kane ka prokram ai jinghikai la tip kum ka State Level Mock Exercise on Earthquake Disaster, ha kaba ia kane ka prokram la pynlong ha Umroi Airport ha Ri Bhoi District bad ha kane ka jingai jinghikai la sakhi ba u jumai uba heh uba la poi haduh 8.2 Magnitude u la khie ha Umroi Airport ba la sakhi ba la don ka jingshah pynjot bad ki kynhun ai jingiarap bapher bapher ki la mih shakhmat ban ai jingiada ne iarap ia kito kiba shah ktah ha u jumai.

La shim bynta ruh ha kane ka Mock drill ne ka jingai jinghikai da ka jingdon lang u Bah A. Myrthong Assistant Commissioner ka Ri Bhoi District, ki heh ophisar na ka Tnad Pulit, ki Nongtrei na ka Tnad ka koit ka khiah, na ka Tnad Fire & Emergency Service, ki Nongtrei na ka Bhoirymbong C&RD Block, ki Nongtrei ka Uroi Airport lem bad kiwei kiwei ki heh ophisar. Ha kane kajuh ka sngi la pynlong ruh ia kane ka State Level Mock Exercise On Earthquake Disaster ha M/S Umiam Distillation Pvt Limited EPIP, Byrnihat.