Nongpoh, Rymphang 04: Ki paidbah nonghsong shnong ka Lower Balian Byrnihat mynta ka sngi da ka jingbitar ki la mih padbah ban ia iaid paidbah na ka bynta ban pyrshah jur ia kawei na ka Kompani ba la tip kum ka Shyam Centuray Ferrous Limited kaba don ha Lower Balian, halor ka jingkynnoh ba ki la pyntreikam beain ia ka Karkhana khlem da don ki kot ki sla bad ba ki paidbah ki hap ban mad tang ia ka jingjaboh na ka jingmih ki jaboh na katei ka Karkhana.
Na ka liang ki paidbah naduh ki longkmie, ki longkpa, ki samla bad ki riew rangbah mynta ka sngi ki la rah syndon da ka placard ryngkat ki jingtoh ban pynrem ia katei ka Karkhana kaba pyntreikam beain khlem kano kano ka NOC na ka Shnong bad khlem da don ki kot ki sla kiba paka.
Kane ka jingpyrshah ki paidbah nongshong shnong ka dei hadien ba katei ka Karkhana ka wan pynlang ia ki Clinker ha katei ka Karkhana khlem da ioh NOC na ka Shnong bad la shu pyniaid jar jar, katba ki paidbah pat ki hap ban mad ia ki pum pum bad ki lyer jaboh ba her na ka jingwan pynlong ia kitei ki Clinker bad ruh ka jingwan poi ki Trok ba iaid na katei ka shnong ka la pynjaboh shisha ia ka lyer bad ia ka shnong ka thaw.
Ha kane ka sngi, ki paidbah ryngkat ki placard ban pynrem ki la tur sha katei ka Karkhana ban dawa ban pyni ia ki kot ki sla ba ka la ioh na ka sorkar bad na ka Shnong, hynrei ki bor pyniaid katei ka Karkhana kim shym la lah ban pyni ia kita ki kot ki sla ba la ioh bor ban pynlang ia kitei ki Clinker ba wan pynlang ha katei ka Karkhana.
Kumba la lap ruh katei ka Karkhana ka la thoh ha khyrdop da ka jingtoh ba la ong ‘Plant Closed’, hynrei ki pyniaid pat da ki Clinker ban pynlong hapoh katei ka Karkhana kaba la pynjaboh ia ka shnogn bad ki shnong ki mad jingeh shisha ha ka koit ka khiah bad shem jingeh ruh wat ban thad jain namar ba la jur ka lyer jaboh bad ki pum.
Ha kane ka sngi, na ka liang ki paidbah ryngkat ki rangbah, ki la khang tala syndon ia ka khyrdop jog katei ka karkhana kaba de hadien ba kim shym la lah ban pyni ia ki kot ki sla ba ki la ioh bor ban pyniaid ia ktiei ki Clinker.
Na ka liang ki nongialam shnong naduh u Assistant Secretary Shnong u Bah Phrangsngi Pohtam, u Suranjit D. Sangma, u dkhot ka Executive Committee ka Shnong bad u Himanta Timung kum u nonghsong shnong, ki la kren sha ki lad pathai khubor ba ia mynta kin khang tala beit ia katei ka Karkhana katba kam pat lah ban pynshai ne ban wan rah ia ki kot ki slab a ka la ioh bor ban pyniaid ia kitei ki Clinker ha kaba da ki spah trok ki poi ha ka shi sngi.
Ki la ong ruh kane ka dei ka sienjam ba ki pyrshah ia kane ka Karkhana bad dang don bun ruh kiwei kiwei ki karkhana ba pyniaid beian ha kaba ki la maham lypa ba ki dei ban khang noh lada kim ioh bor na ka sorkar ne na ka Shnong bad lada ki dang pyrshah ki paidbah kin leh kumjuh kumba leh ia kane ka Shyam Century Ferrous Limited.
Ha kane ka sngi, ki paidbah ki la pynrem jur ruh ia ka Meghalaya State Pollution Control Board ba kam shym la leh ei ei ia kum kine ki Karkhana ba pynmih jaboh bad ki la kyrpad ruh na ka sorkar ba ka dei ban tehlakam bad lada ka dang long kumne kum ki paidbah kim banse ban shim da kawei pat ka la lynti ba kane ka la ktah ia ka koit ka khiah bad ia ka jingring mynsiem kaba la jur palat ka lyer jaboh.
