Nongpoh, Lber 17: Ka Meghalaya State Legal Service Authority (MSLSA) mynta ka la pynlong ia ka prokram ai jinghikai kaba kyrpang na ka bynta ki nongialam shnong ki nongialam thaw kum kawei na ka thong ban pynshai halor ki aiñ bad ki lad jingaiarap na ka sorkar ha kaba ia dei bad ki kam aiñ ba ki paidbah ki donkam ka jingiarap na ka sorkar.
Ia kane ka prokram ia jinghikai ba la tip kum ka ‘Mediation and Community Mediation’ na ka bynta ki rangbah shnong bad ki syiem la pynlong ha Umling C&RD Block, Ri Bhoi District.
Ha kan ka prokram la shim bynta lang da u T.T.M Sangma (MUS), Officer on Special Duty, ka MSLSA, ka Kong I. Lyngkhoi, Secretary ka DLSA Ri Bhoi District, u Bah Eric C. Dkhar, BDO ka Umling C&RD Block bad kynthup ki rangbah shnoing bad kiwei kiwei ki nongmihkhmat na bor synshar district.
Kumba la pynpaw, ka jingthmu ba kyrpang ba la pynlong ia kane ka prokram ai jinghikai, ka dei ka thong ban pynthikna ban pyntreikam hok ia ki lad jingiarap (legal aid Schemes) ha kaba ia dei bad ki kam aiñ ba donkam jingiarap ki paidbah.
Ka sorkar lyngba ka MSLSA ka buh thong ban ai ka jingshakri sha ka imlang ka sahlang da kaba ai lad kyrpang ba ki ioh ia ka jingbishar bahok la kadei ha kano kano ka kam aiñ ne mokotduma, kyrpang na ka bynta kito kiba ym kot bor ban buh nongiasaid ha ki kam mokoduma ba ka sorkar ka pyntreikam ia ki scheme kyrpang.
Lyngba kane ka prokram ai jinghikai ba la tip kum Increasing Access to Justice through Community mediation, ka thong kaba ha khmat ka long ban pynioh ia ka jingbishar kaba hok ha kino kino ki mokotduma bad ki don ruh ki lad jingiarap na ka sorkar lyngba ki skhim na ka bynta kito kiba ym kot bor ban buh ia kita ki nongiasaid aiñ.
