Shillong, Lber 17: Ki paidbah nongleit nongwan na ka thain Police Point ha Laitumkhrah ki la her mynsiem bad kyuh thor thor, tang hadien ba ki bor pulit ka East Khasi Hills District ki la kerkut ia kawei ka jaka kaba don hakhmat ka Prakash Hotel namar ka jingsuba don bomb ha ka pla kaba la shu ieh hajan katei ka hotel.
Kumba la ioh jingtip, ki pulit ka East Khasi Hills District tang mar ia ioh jingtip halor ka jingdon jong kawei ka pla ba la ieh hajan kawei ka hotel kaba don ha ki thaiñ ka Police Point Laitumkhrah, kumta ki pulit ki leit sha katei ka jaka bad ban kerkut ia ka katkum ka rukom ban iada na kano kano ka jingjia kaba sngewsih.
Na ka liang u Bah Vivek Syiem, Superintendent of Police ka East Khasi Hills District, u la pyntip, ba ki pulit ki la hap ban kerkut ia katei ka jaka ban iada na kino kino ki jingjia katba dang khmieh bniah ia katei ka pla kaba la shu ieh ha katei ka jaka.
La iathuh ruh, ba hadien ba la jurip bad khmieh bniah ia katei ka pla, la lap pynban ia ka laptop, ka Pan Card kaba dei jong u wei u bar jylla ba la tip kyrteng kum u M. Ahmed ia u ba la dep ban pyntip bad don ha lynti ban wanshaw ia kane ka pla kaba u la kum ieh hakhmat ka Prakash Hotel.
