Tura, Kyllalyngkot 27: U Myntri Rangbah ka jylla u Conrad K Sangma, mynta ka sngi u la leit ban plie paidbah ia u mawnongrim ban tei ia ka Greater Tura Urban Water Supply Scheme ha ka jingialang kaba la long ha Tura District Auditorium.
La ia donlang ruh ha kane ka prokram, da u Myntri ka tnad PHE u Marcuise N Marak, u Chief Secretary ka jylla u Bah DP Wahlang, Principal Secretary ka tnad PHED, u SMA Razi, and u Chief Engineer ka PHED ka Kong BM Lyndem nalor kiwei kiwei ki ophisar ka tnad PHE bad ki bor pyniaid district ka Tura.
Haba kren ha kane ka sngi, u Conrad K Sangma, u la pynpaw ia ka jingkmen kaba khraw ban sakhi ia ka jingurlong jong kane ka project ban pynbiang umbam umdih ha ka sor bah Tura, kaba dei ka project kaba la kdew nyngkong naduh u snem 2004, ha kaba 21 snem mynshwa ha kaba u la iakhun ia ka ileksion By Election na Selsella, ia kane ka project la pynmang da u PA Sangma (Bam Kwai ha Dwar u Blei) ha u snem 2004-05 da ka jingthmu ymtang ban pynmyntoi ia ka jingsam umbam umdih ha sor Tura hynrei ban myntoi ruh ha ka liang ka kam rep kam riang, ka kam ri dohkha bad ka kam jngohkai pyrthei.
“Ka long shisha ka jingkmen kaba khraw ia nga, ban plie ia u mawnongrim jong kane ka project”, ong u Conrad, da kaba kdew ruh ba ia kane ka project Tura Urban Water Supply Scheme la mang ban pynlut ha ka dor 398.48 Crore ban pynbiang ia ka rukom shalan umbam umdih ha Tura ia kaba la mang ruh da ka sorkar pdeng lyngba ka mang tyngka kaba kyrpang (Special Assistance on Capital Investment) bad ban pyndep ia ka jingtrei hapoh 24-36 bnai.
U la ong ruh, ba kane ka skhim kan dei ka jingpynurlong ia ka thong jong ka sorkar jylla ban pynbit pynbiang bad pynmyntoi ia ki nongshong shnong ka Tura, da kaba bei pisa ban tei ia ki jingtei ne ki project bapher bapher, ia kaba la kyrmen ba mar ia dep kane ka project kan long shisha ka jingkyrkhu ia ki paidbah kane ka thain da kaba kyrpad ruh ia ka jingiatreilang hapdeng ki nongialam shnong, ki tnad treikam sorkar bad kiwei kiwei khnang ban pyntikna ba ka jingtei ia kane ka project kan long kaba jop.
Lyngba ka Tura Urban Water Supply Scheme yn don ruh ia ki jingtei bapher bapher kynthup ia ka dam ban pynlang ia ka um, ka jingtei ar mala ia ka pumping stations, ka treatment plant, ka feeder mains, ki kor sam um kiba paka da kaba pyndonkam ia ka jinglong jingman jong ka wah Ganol ban pyntikna ruh ia ka jingsam ia ka umbam umdih kaba khuid bad ban pynbiang katkum ka jingdonkam jong u paidbah.Ha kane ka sngi, na ka liang u Myntri Rangbah ka jylla u Conrad K Sangma u la sam ruh ia ki lad jingiarao sha ki nongioh bhah na ka CM Elevate bad ka Community-Led Tourism Infrastructure Scheme.
