Ha ka 1 tarik u Naiwieng, ki heh nongialam ka KSU Sengkmie, ki la hiar sha ka shnong Tasku ha Ri Bhoi, kata na bynta ban leit pynskhem ia ki samla na katei ka shnong bad kiba la rai ialade ban pyniasoh noh sha ka KSU bad lyngba jong katei ka sngi, na ka liang ka KSU ka la thaw syndon ia ka shnat treikam ba thymmai jong ka seng hapoh katei ka shnong bad kaba la tip kum ka KSU Tasku Unit, kaba hap hapoh ka jingpeit jingkhmieh jong ka KSU Western Border Area Unit.
Ia kitei ki samla na shnong Tasku bad kiba la pyniasoh sha ka KSU, la leit ban pynskhem ia ki da u Samla Biangbor L.Paliar, Vice-President ka KSU Sengkmie, ha ryngkat ka jingdonlang u Samla Melajied Khongbuh, Assistant Publicity KSU Sengkmie, nalorkata la sakhi da ka jingdon ki nongialam ka KSU, NKHD, kiba kynthuep ia u Samla Lambok Rymbai, Vice-President KSU NKHD Unit, u Samla Jester Nongbet, Assistant Organising KSU NKHD Unit, u Samla Augustine Nongbri Finance Secretary KSU NKHD Unit, u Samla Receive Pator, President ka KSU Western Border Area lem bad kiwei.
U Samla Biangbor L.Paliar, haba u ai jingkren ha katei ka sngi ba la pynskhem ia kitei ki dkhot ba dang shu rung thymmai sha ka KSU, u la pynkynmaw ia ka jingiakhih Railway haba 45 ngut ki dkhot ka seng ki shah thep sha along bad wat hap hapdeng ki jingtynjuh, hynrei ki khlem randien ne die tad dor ia ka ri, pynban ki iengskhem beit halor ka nongrim.
Namarkata, na ka liang utei u heh nongialam ka KSU Sengkmie, u la kyntu ia ki nongialam bad kumjuh ruh ia ki dkhot jong ka Tasku Unit, ba ki dei ki ban long kiba kloi ban mih haba ka seng ka donkam ia ki ha ka step ba phyrnap ne ka miet ba dum.
Ki nongkitkam ba KSU Tasku Unit, ki kynthup ia u Samla Maitphang Thangkhiew, kum u President, u Samla Everest Diya kum u General Secretary lem bad 25 ngut ki dkhot kiba dang shu rung thymmai sha ka KSU.
