Nongpoh, K’lyngkot 23: Ki paidbah ka shnong Maikhuli ki la lah ban pynieng haduh 17 tylli ki Post Ilektrik ban pynpoi bording sha ki katto katne ki longing hapoh katei ka shnong bad kiba don ha syndah eh bad ka jylla Assam.

Lah ruh ban kdew hangne, ba ha ka 20 tarik mynta u Bnai, ki briew na ka shnong Maikhuli, ki la sdang ban pynieng da kaba pynskhem ruh da ka Dewbilat, hynrei katba ka jingpyntrei ka dang iaid, la wan ki briew na ka jylla Assam, kiba la pyrshang ban pynsangeh ia katei ka jingthmu pynieng POst Ilektrik, kaba la wanrah ia ka jingiania kaba jur bad kaba la poi shaduh u pud jong ka jingiashoh ia dat.

Hynrei ha ka sngi kaba bud, ki briew na katei ka shnong, ki la sdang biang ban pynieng bad pynskhem ruh ia kitei ki Post Ilektrik da ka Dewbilat, nalorkata ki la lah ruh ban pyniasoh ia ki waiar sam bording na uwei sha uwei u Post Ilektrik bad kaba la poi bording sha baroh ki longiing ha katei ka shnong bad kiba donkam ban ioh bording.

Halor ka jinglah ka shnong ban pynieng ia kitei ki Post Ilektrk na bynta ban pynpoi bording ha ki longiing ba donkam bording, na ka liang ka shnong ka ai jingiaroh bad sngewnguh ia u Conrad K. Sangma, Myntri Rangbah ka sorkar jylla, nangta ia u Bah Sosthenes Sohtun, MLA Jirang, namar ba ki la shimkhia halor katei ka jingjia bad khamtam hadien ba ki la ioh jingtip, halor ka jingshah pyndik ki briew ka Maikhuli ha ka por ba ki thmu ban pynieng ia kitei ki Post Ilektrik.

Kitei ki Post Ilektrik kiba la pynieng da ka Meghalaya ha shnong Maikhuli, ki long beit thik kumba la wan pynieng da ka Assam ha ki bynta ka shnong Ummat, Block-2, ha kaba ka rukom pynpoi bording na uwei sha uwei u Post Ilektrik ka long kaba kham pher, namar ia ki waiar ban sam bording la dep ban sop bad kaba shem jingeh ia ki briew kiba mlien ban tuh bording.