Shillong, K’lyngkot 23: U James K.Sangma kum u National Working President ka National People’s Party (NPP) mynta ka sngi u la shim khia mardor halor ka jingshah thombor u Pastor Bipin Bihari Naik ha ki paidbhur ka Dhenkanal ha ka jylla Odisha bad ba la poi ruh shaduh u pud ba ki paidbah ki la pynbam da ka eit masi ia utei u Pastor.

Ha ka shithi ba u la phah sha u Myntri rangbah ka Odisha u Mohan Charan Majhi, u James K. Sangma u la pynpaw ia ka jingsngewkhia kaba jur halor ka jingshah kynnoh ba ba ki paidbah ki la thombor ia u Pastor kaba la jia ha ka 4 tarik u Kyllalyngkot 2026.

U Sanama u la bankhia jur ba ka jingkhlain bor ka ri India ka shong ha ka dor jong ka riti synshar ka ri, ha kaba la ai laitluid ia uwei pa uwei u nongshong shnong ka ri India ba un don ha kano kano ka jingngeit kaba u sngew iahap jingmut bad kum kine ki jingthombor donkam ban tehlakam da ki kyndon jong ka ain kumba la pynkupbor da ka riti synshar ka jong ka ri.

Katkum ka jingsngew jong u James K. Sangma, la ong ba kum kine ki jingjia ha ki jylla ba shongsuk shongsain kum ka Odisha ka ktah shisha ia baroh ki nongshong shnong ka ri bad kane ka ktah jur ruh ia kito kiba long Khristan kiba im ha ka jingim badon burom bad ruh kiba burom ia lade bad ia kiwei.

“Ka jingthombor u paidbah ym lah ban ailad ban bujli ia kita ki kyndon jong ka riti synshar kaba thombor pyrshah ia ki riew shimet ha kata ka jingngeit kaba ki don bad donkam ban tehlakam katkum kita ki kyndon jong ka riti synshar ka ri bad donkam ban bishar ne tohkit bniah ha kaba kane ka jingshah thombor u Pastor Pastor Bipin Bihari Naik la donkam ban tehkyndon bad u donkam ruh ia kata ka jingiada katkum kita ki ain jong ka ri” ong u James. K Sangma kum u Nongialam bahakhmat ka NPP.

Shuh shuh, u la pynpaw ruh kum kine ki kam thombor pyrshah ia ka jingngeit kiwei kam long kaba lah ban pdiang ha kane ka ri sysnhar paidbah bad u kyrmen skhem ba u Myntri Rangbah ka Odisha  un sa shim khia mardor na ka bynta ban pynioh ia ka hok jong u pastor uba la shah thombor ha ki paidbah.