Nongpoh, Jylliew 29: Ka Regional Institute of Advanced Studies (RIAS), kaba dei kawei naki shlem ai jinghikai computer ha Ri-Bhoi, mynta ka sngi ka la pynkup burom ïa ki samla pule kiba la pyndep hok ïa ki jingshah hikai bapher bapher jong ka Computer Application ha Science Hall ha Nongpoh ban nang pynïar ïaka pyrkhat pyrdaiñ katkum ka juk stad ba mynta.
Ha katei ka jingïalang pynkup burom u Bah A.L.Hek, myntri ka tnad ri jingri, u la wan ban shim bynta ha kane ka sngi kum u Kongsan haka jingdon lang ka kong Rona Khymdeit kaba dei ka MDC barim jong ka Nongpoh Konstitwensi, Bah Kyrshan Timung Rangbah Shnong ka Diwon bad u Bah Skhem B Swett uba dei u Director jong ka RIAS ha ryngkat ki samla pule kiba la dep pyntbit haki course bapher bapher.
Haba kren ha katei ka sngi, u Director ka RIAS u Skhem B Swett u la ong ba kane ka juk stad kaba mynta ka dei kaba dap tang da ki jingiakhun, da kaba pynksan ia ka jingkiew sted ha ka Artificial Intelligence bad ki jingstad jingkhein jingdiah da kaba kyntu ruh ïa ki samla kiba la pyndep ïa ka jingpule ba kim dei ban shu wad kam sorkar hynrei ki dei ban thaw thymmai bad thaw ki lad ki lynti da kaba pyndonkam ïa ka jingnang jingstad kaba ki la ïoh namar kane ka juk, dei tang kiba trei shitom bad kiba minot kiba poi shaka thong ka jingjop.
U la ong ruh bun naki samla ha kane ka juk ba mynta kila pyndep ïaki jingpule bapher bapher hynrei kim nang kumno ban pyntreikam bad pyndonkam ïaka sap ka jong ki namar ngi donkam ban trei shitom ban ïeng hala ki jong ki kjat bad ban pynjanai ïaka jingstad katkum ka jingïaid ka por.
U la pynpaw ruh ïa ka jingthmu jong ka RIAS ban pynlong ïaki jingai jinghikai haka kor computer ka long ban nang pynjanai ïaka jingstad jong ki khynnah nalor ka jingpule jong ki haki shlem pule bapher bapher ba kin nang ban pyndonkam ïaka sap ka jong ki kumba bun naki kam mynta la pyndonkam beit da ki kor computer katkum ka jingïaid jong ka por bad naka liang katei ka shlem ka dang pyniar ruh mynta sa ka jinghikai ha kaba ïadei bad ka put ka tem haka thaiñ Umden.
U Bah AL Hek kum u kongsan u la ai ka jingïaroh ïa ki samla pule na ka bynta ki jingjop jong ki ha ka jingpule computer, da kaba pynksan ïa ka bynta ba kongsan jong ka teknoloji ha ka imlang sahlang kaba mynta, khamtam eh da ka jingwan jong ka jingstad thymmai ka Artificial Intelligence.
U la ai ka jingïaroh ïa ka RIAS halor ka jingpyrshang jong ka ban ai jinghikai kaba bniah ha ki jait jingstad computer bapher bapher, ban kyntiew ïa ka sap ka phong bad ka jinglah jong ki samla pule.
Ha katei ka sngi la sam ruh ïaki syrnod sha ki samla kiba la pyndep ïaki jinghikai bapher bapher ha kaba ïadei bad ka kor Computer.
