Nongpoh, K’lyngkot 10: Ka Party BJP Ri Bhoi District ha ka jingialam u President u Bah Sen Thabah ki la pynpaw ia ka jingsngewkhia halor ka jingialam bakla ka Party Congress ha ka ri bad ha ka jylla Meghalaya, ba ka party Congress ka la pynsngewthuh bakla ia ki paidbah hadien ba la pynkylla kyrteng ia ka skhim MGNREGA sha ka kyrteng thymmai ba ba la tip kum ka VB-GRAMG Act 2025.
Haba kren sha ki lad pathai khubor ha Nongpoh, u President ka BJP Ri Bhoi District u Bah Sen Thabah bad u State President ka BJP State ST Morcha u Himanta Timung, ki la ong ba ka sorkar BJP ka la pynkylla kyrteng ia katei ka skhim bylla shispah sngi kam dei ba ka don jingthmu ei ei sha lyndet, hynrei ka jingpynkylla kyrteng ka dei ban dang pynjanai bad pynbha shuh shuh ba ki nongshong shnong ha ka ri India hi baroh kawei ki dei ban dang kham ioh jingmyntoi na kane ka skhim.
Ki la ong ruh ka jingpynkylla kyrteng ia ka skhim kam don jingktah ei ei ia ki nongshong shnong ka ri kiba dei ban ioh jingmyntoi na kane ka skhim, hynrei hadien ba la pynkylla kyrteng ka la dang ai jingmyntoi shuh shuh ia ki paidbah ba na ka jingioh bylla sngi kaba 100 sngi la pynkiew haduh 125 sngi ba ki nongshong shnong ki dei ban ioh jingmyntoi ha ki kam pynroi bad ka kam bylla lyngba kane ka jingpynkylla kyrteng ka party BJP.
Ki la pynshai ruh da kaba ong ba ka BJP ym tang ba ka pynkylla kyrteng ia katei ka skhim bylla sngi ki nognshong shnong ka ri, hynrei la dang pynjanai bad pynbha shuh ba ka jingmang tyngka dei haduh 90% na ka sorkar kmie bad tang 10% na ka sorkar jylla bad haba ia nujor bad katei ka MGNREGA ki paidbah kin dang ioh jingmyntoi shuh shuh hadien ba la pynbha bad pynkylla kyrteng ia katei ka skhim.
Shuh shuh, ki la ong ruh ka jingpynkylla kyrteng ia katei ka skhim kan nym ktah satia ia ki paid nongshong shnog ka ri India, hyrnei ki dang ioh jingmyntoi shuh shuh ha ka kam bylla bad ki kam pynroi, namar ka sorkar kan pynsted ruh wat ban pynlait ia ka pisa ym kumba long ha kane ka skhim ha ka por ba dang pyntreikam ka party Congress, ki la bynrap.