Nongpoh, K’lyngkot 21: Ka long shisha ka jingai mynsiem ia u Bah Micky Douglas Syiem, u Kyrtong ka seng Congress u ban ia kun ha ka election MDC na Umroi Constituency, namar mynta ka sngi ki nongialam bad ki dkhot ka Umroi Constituency Progressive Forum (UCPF) ha ka jingialam u President u Bah Pynskhem Sohtun, ki la wan ban pyniasoh noh sha ka party Congress ban ia ka jingkyrshan ia une u kyrtong ka seng Congress.
Kum ban pynkynmaw, u Bah Micky Douglas Syiem, u dei u Working Presdient ka UCPF, ha kaba u la leit ban pyniasoh shwa ia lade marwei sha ka seng Congress ban pan ia ka ticket, ba ka party Congress ka la ibit ia u kum u kyrtong ka seng Congress na Umroi bad mynta ka sngi, pat ki nognialam ka UCPF lem bad kiwei ki dkhot ki la wan ban pyniasoh sha ka Seng Congress ban dang ai ka jingkyrshan ia une u kyrtong ka seng Congress.
Ia kane ka jingleit pyniasoh kitei ki nongialam ka UCPF la pynlong ha Madan ialehkai phutbol ka shnong Umroi bad la sakhi lang ruh ha kane ka sngi da ka jingdon lang u Bah P.N Syiem, Working President ka MPCC, u Bah Standlywiss Rymbai, Adviser ka Ri Bhoi District Congress Committee, u President ka RBDCC u Bah M.G Kharshanlor, u Bah Micky Douglas Syiem kum u kyrtong na Umroi bad ryngkat ka jingdon lang kiwei ki kyrtong ka congress ba kynthup ia u Bah Victor Rani na Jirang, u Bah Rocky A. Marwein na Umsning, u Bah Lawrence Nongrum na Nongpoh, u Bah Dominic Mysnong na Mawhati bad ia ka jingialang la pyniaid da u Bah Sunglight Shadap, President ka Umroi Block Congress Committee.La ai mynsiem ruh ha kane ka sngi don lang ki nongkyrshan bad ki nongialam na ka UCPF bad na ka seng Congress.
Haba ai jingkren ha kane ka sngi ban pan ia ka jingkyrshan na ki paidbah ka Umroi Constituency na ka bynta ban pynjop ia u Bah Micky Douglas Syiem, u Bah P.N Syiem kum u Working President ka MPCC, u la ong ba kane ka election MDC ka dei ka election kaba kham pher bad bun ki briew kim da sngewthuh ban pynleit jingmut bad lada pynleit jingmut bha ka dei ka election kaba donkam bha ba ki hap ban jied ia ki party bad ki kyrtong kiba don ia kata ka bor ban thaw ia ki ain ha ka ing dorbar ha KHADC.
U la ong ruh dei ka party Congress kaba la ai ia ka jingpynkup bor ban iada kyrpang ia ki jaid bynriew Khasi ban wan rah ia ka ain ba kyrpang ba la tip kum ka Sixth Schedule bad dei lyngba ka jingdon ka sixth Schedule ngi la ioh ia ka jingiada kaba kyrpang ban pynneh pynsah ia ki riti ki dustur bad ka jinglong tynrai jong ka jaid bynriew khasi jongngi.
U la pynshai ruh ba ka jingjied ia ki nongmihkhmat sha ka District Council, ka long ban shna ia ki ain kiba kyrpang ban iada ne pynkup bor ia ki riti ki dustur bad ka jinglong tynrai jongngi kum ki Khasi bad lada ym don kita ki ain ba pynkup bor ne iada ka long ka jingma ia ka jaid bynriew Khasi jongngi.
Na ka liang u Bah Micky Douglas Syiem, haba kren ha kane ka sngi, u la pynpaw ba kum u rangbah katei ka thain u la don bynta ha ki kam paidbah bapher bapher bad ban iarap kyrpang na ka bynta ka jingdonkam ki paidbah u donkam ba ki paidbah kin pynkup bor khnang ba un lah ban leh shibun ki kam kiba u angnud ban shakri ia ki paidbah katei ka Constituency.
