Nongpoh, Jylliew 19:
Ka jingbret pathar iaki jaboh jabain, ki niut ki nier bad khamtam eh ki plastic ha ki jaka paidbah, ymtang ba ka wanrah ia ka jingpynjot ia mariang sawdong sawkun bad ktah ia ka koit ka khiah jong ki nongshong shnong, hynrei ka pyni ruh sha ka pyrthei ia ka jinglyngkar bad ka jinglong ‘riewkhlaw jong ka jingim ka jong ki paidbah ka thain.
Kiba kum kine ki jinglong lyngkar, la sakhi ruh mynta ka step hadien ha u nongthoh khubor jong u Meghalaya Post u la ioh ban shondur ia ka iew Baridua kaba la dap satang ki plastic, ki jaboh jabain bad wat ha ki nala um ruh kumjuh kiba la dap smam da ki niut. Kane ka iew kadei kaba hap hapoh ka jingpeit jingkhmih jong ka Raid Marwet.
Katei ka jingbret ia ki jaboh jabain bad ki niut ki nier sha ki nala um, ka pynlong pat ia ka um ban nym ioh lad shuh ban tuid, bad kane ka wanrah pat ia ka jingshlei um kaba jur, khamtam ha ki por slap ha kaba la iohi ba ki surok ki dap da ka umslap, kaba la pynsyrtok shikatdei ia ki paidbah nongleit nongwan.
Haba pyrshang wad jingtip halor kane ka bynta, la ioh jingtip ba naka liang jong ki bor pyniaid shnong ka Baridua, ki ju pynlong ia ka jingpynkhuid ia kane ka iew naka por sha ka por, hynrei la kynnoh ba ka jingioh lad jong kiba bun ki bar jylla ban wan shong dukan ha kane ka iew, ki bym don ia ka jingtiplem halor ka lehkhuid leh suba bad ki bym khein snep ruh ia ki jingmaham jongki bor pyniaid shnong, kadei kawei na ki dawbah jong ka jingjaboh katei ka iew.
Na ka liang ki paidbah nongshong, ki la buh ruh ka jingkyntu ia ki nongialam shnong ka Baridua ba kidei ban shim ia ki sienjam kiba tyngeh ia kitei ki nongshong iew bar jylla kiba leh khlem akor bad pynjaboh ia ka shnong ka thaw, da kaba ong ruh ba katei ka jingleh jong kitei ki nongshongiew bar jylla ka pynkhlem rain ruh ia ka shnong ka thaw hakhmat ki paidbah nongleit nongwan khamtam kumba katei ka shnong Baridua kadei kaba don harud jong ka surok bah National Highway 6.
