Nongpoh, Naiwieng 22: Ha ka sien kaba nyngkong, ka kynhun ki briew kiba shong ba sah ha ki shnong kiba hap ha Raid Marwet, ki la lah ban thaw ia kawei ka kynhun Sengbhalang bad kaba la tip kum ka All Raid Marwet People Federation (ARMPF), ia kaba la pynskhem mynta ka sngi ha shnong Baridua, Ri Bhoi.
Ia ki nongialam jong ka ARMPF Sengkmie, kaba dei ka seng thymmai, la pynskhem da u Ken Syiem, Syiem ka Raid Marwet, ha ryngkat ka jingdon u Bah Ioanis Narleng, Rangbah Shnong Baridua, ki Rangbah Shnong kiba hap ha Raid Marwet, ki riew rangbah jong ka thaiñ Marwet lem bad ki longkmie.
Ki nongialam ba hakhmat ka ARMPF Sengkmie, ki kynthup ia u Bah Ring Sohpdang kum u President, u Komol Shakwa kum u General Secretary, u Shankar Sohpdang kum u Finance Secretary, u Roman Nongrum, Sports Secretary lem bad kiwei.
La ong ba la seng khnang ia katei ka seng, ka long ban trei na bynta ka bha ka miat jong ki jaidbynriew Marwet kiba shong ba sah ha khappud, kata ka long ban wanrah ia ka jingiatylli, ka jingiatreilang bad nalorkata ban trei na bynta ka ri bad jaidbynriew.
U Ken Syiem, haba u kren kum u nongpynskhem ia kitei ki nongialam ka ARMPF, u la pynpaw ia ka jingkmen ba ha ka sien kaba nyngkong eh, ba ki samla ha Raid Marwet, ki la thaw ia katei ka kynhun Sengbhalang, namar ha kine ki snem kiba la leit noh baroh, ym pat don kano kano ka seng kaba dei trai na Raid Marwet, hynrei mynta pat ba la mih ka ARMPF, ka pynkmen eh ia u kum u Syiem, namar lyngba jong ki, yn nanglah shuh shuh ban trei ia ki kam babha hapoh ka Raid Marwet hi baroh kawei.
Na ka liang u Syiem Raid Marwet, u la kyntu ia ki nongialam jong katei ka seng thymmai, ba ki dei ban long kiba iatreilang bad ki bor shnong bor thaw, khamtam eh ban trei na bynta ka hok jong ka bynriew Marwet.
U la ai ruh ka jingkitbok kitrwiang ba katei ka seng ba kan nanglah ban trei ia ki kam babha ha ki shnong ki thaw bad ruh ba kan nangkiew rasong ha ki sngi ki snem ki ban nangwan.
Ki nongialam ba hakhmat ka ARMPF Sengkmie, ki kynthup ia u Bah Ring Sohpdang kum u President, u Komol Shakwa kum u General Secretary, u Shankar Sohpdang kum u Finance Secretary, u Roman Nongrum, Sports Secretary lem bad kiwei.