Nongpoh, Lber 26: Ka Dorbar Raid Nongpoh kaba hap hapoh ka Hima 12 Lyngdoh Nongpoh Sirdarship Eleka sa shisien ka la pynkhreh pynkhrum biang ïaka ïingsad, u dieng sad jong ka raid naka bynta ban pynlong biang iaka Tamasa Shad Sajer jong ka raid, ha kaba ha kane ka sngi ka la pynbna paidbah ba ka Dorbar Raid Nongpoh kan pynlong biang iaka ka tamasa Shad sajer kumba ju pynlong man la u snem ha u Lum Wyrtoh u ba don hapoh u pud u sam jong ka raid nongpoh.
Haba kren sha ki nongthoh khubor, u Bah Linus Lyngdoh, u Lyngdoh ka Raid Nongpoh u la ïathuh, ka raid Nongpoh kan pynlong biang ia katei ka Tamasa Shad Sajer ha ka 29 tarik Lber 2025 ha u Lum Wyrtoh bad u la pynpaw ruh, Ka jingthmu Jong ka Raid Nongpoh ban pynlong ïa katei ka tamasa Shad Sajer ka long ban nang pynneh pynsah ïa ki riti ka dustur Jong ka raid kumba la buh naduh ki mynbarim ba jah. Bad ha ka juh kapor ka jingpynlong ïa katei ka Shad Sajer ka dei ban pyni sha ki paidbah ïaka jing riewspah jong ka raid Nongpoh halor ka jingdon ki Riam tynrai bad kumjuh ruh ka shad tynrai.
U Bah Lyngdoh ka Raid u la ïa thuh ruh, ha Katei ka ka sngi kin don ruh ki jingtem tynrai da ki raid bapher bapher ha kaba yn sa pyni ruh ïaka ki jingshad tynrai, bad nalor ki jingshad jingtem tynrai kin don ruh ki jingialehkai tynrai kiba kynthup iaka jingiatan tyllai, ka jingiakop kiew siej bad ki Stall ki ba lah ban ioh iaki jingbam tynrai. La pyntip ruh, ha katei ka tamasa yn wan ban ia sakhi lang da u Symbud Myntri Rangbah ka Jylla u Bah Prestone Tynsong kum u kongsan bad u MLA ka Nongpoh u Bah Mayralborn Syiem kum u symbud kongsan.
Ka Dorbar Raid Nongpoh lyngba U Lyngdoh ka Raid ka la pyntip ruh ba kin don ki kali ki motor ki ban kit iaki paidbah ki bym don kali ban ïa wan sha katei ka jaka bad ha kajuh kapor ka Dorbar Raid ka khot ka wer ia ki paid ki hajar Jong ka Raid Nongpoh bad kumjuh ruh ïaki khun ki hajar na kiwei kiwei ki raid bad ki para marjan ba kin kiew sha u lum Wyrtoh ha katei ka sngi khnang ban ïoh ïa sakhi lang ïaka tamasa Shad Sajer kaba ju pynlong man la u snem.
