Shillong, Lber 25: Ka Committee bala thung da ka Iingkashari Meghalaya High Court, ba la khlieh ruh da u Ritired Justice BP Kateky, ka la wanrah paidbah ia ka kaiphod halor ka jinglap ba don haduh 1.92 lakh metric ton u dewiong ba la tih beaiñ ha ki saw tylli ki district jong ka jylla Meghalaya.
Ha ka jingiakren bad ki Lad Pathai Khubor mynta ka 25 tarik Lber, u Justice Katekey u la iathuh, ba la lap ia u dewiong ba la tih beaiñ ka dei hadien ka jingpyndep ia ka sor jamin na suin (Aerial Survey) ha kaba la lap ba ha ki saw tylli ki district ki don kumba 1.92 lak ton u dewiong ba la tih beaiñ.
La pyntip, ba kine ki District kiba lap ia ka jingdon dewiong beaiñ ki kynthup ia ka East Jaintia Hills District, ka West Khasi Hills District, ka South West Khasi Hills District bad ka South Garo Hills District, da kaba bynrap ruh, ba ka Komiti ka la pan jingshai na ki bor pyniaid district halor ka jinglap ia u dewiong bym pat don jingkhein hapoh ka shisngi ar sngi.
Shuh shuh ruh, u la iathuh, ba ia kane kaiphod yn sa aiti noh sha la Iingkashari ka Meghalaya High Court ban leh pat ia kaba donkam bad ka jingpyntip paidbah ia kaei ka sienjam kaba shakhmat, da kaba bynrap ruh, ba ha ka jylla Meghalaya ki don 8 ngut kiba la ioh ia ka License hynrei tang 3 ngut kiba la ioh ia ka Environmental Clearance, kiwei ki dang hap ban ap ban ioh ia kane ka Clearance.
