Nongpoh, K’lyngkot 12: Kumba 28 ngut ki Nongthir ksai Ryndia kiba dei ki Longkmie mynta ka sngi ki la ioh pdiang ia ki synot (Certificate), kaba dei hadien ba ki la pyndep ia ka jingai jinghikai halor ki kam thir ksai ryndia kaba 50 sngi, ba la pynlong ha Nongrim Umpowin bad ba la pyniaid da ka Eri Weave Private Limited ha ka jingialam ka Kong Iaishah Rymbai kum ka Director.

Ha kane ka jingsam ia kitei ki synot  ba la pyniaid da ka Umpowin CLF la wan ban shim bynta da u Bah Charles Marngar MLA ka Mawhati kum u kongsan bad la sakhi lang ruh da ka jingdon lang ka Kong Iaidshah Rymbai kum ka Director ka Eri Weave Private Limited, u Bah Saibok Khriam SDO ka MSSDS, ki Nongtrei ka Umpohwin CLF, ki nongialam Shnong bad kynthup ki nongmihkhmat na ki 16 tylli ki CLF ha katei ka thain.

Haba ai jingkren ha kane ka sngi U Bah Charles Marngar kum u MLA, u la ai ka jingiaroh ia ka Kong Iaishah Rymbai, ba ka dei shisha ka longkmie ka ba la wanrah burom ia ka Ri Bhoi bad ia ka Jylla hi baroh kawei halor ki kam thir ksai bad ki kam thain jain ba bun ki Longkmie ki la im jakpoh na kane ka kam thir ksai ryndia bad thaiñ jain.

U la ong ruh ba ka Kong Iaishah Rymbai ka la long shisha ka longkmie kaba ai mynsiem ia kiwei pat ki longkmie ba kin mih sha khmat na ka bynta ban ban seng Kam lajong bad ban Kamai haba shongkai.

Ha kane ka sngi, nalor ka jingai mynsiem ia kine ki longkmie kiba ju im jakpoh ha kam thir ksai bad thain jain, u Bah Charles Marngar u la kular ruh ban ia snoh kti lang bad kine ki longkmie da kaba thaw ia ki lad jingiarap lyngba ka MLA scheme bad ruh ban ia trei ryngkat ryngkat bad kitei ki 16 tylli ki CLF kiba don ha katei ka thain.