Shillong, K’lyngkot 12: Ka Khun Hynñiewtrep National Awakening Movement (KHNAM) mynta ka sngi ka la leit ban kynduh syndon ia ka Kong Deity H. Majaw, ka EM ka KHADC ba dei peit ia ka tnad Law and Legal Matters na ka bynta ban dawa na ka Council ba dei ban khang pyrshah ban thep vote ia ki bym dei Khasi ha ka Election jong ka District Council.

Haba kren sha ki lad pathia khubor, u Working President ka KHNAM u Bah Thomas Passah, u la ong ba ka Rule 128 ka Assam and Meghalaya Autonomous District Rules, 1951, ka pyrshah ia ka Sixth Schedule ban shah ia ki bym dei ki Khasi ban thep vote ha ka election jong ka District Council.

U Bah Passah u la pynpaw ruh ia ka jingsngewkhia ba ka KHADC ka lah ban kynduh kumjuh kumba jia ha Garo Hills Autonomous District Council, ha kaba ki bar jylla ki la ioh bor ban iakhun election bad shah jie dkum ki nongmihkhmat ha ka election MDC.

Ban khang pyrshah ia ki bym dei ki Khasi (Non-Tribals) ban thep vote ha ka election MDC, u Bah Passah u la dawa na ka KHADC ba dei ban pynduh noh ia ka Rule Rule 128(1)(d) bad ka Rule 128(3),  bad ruh ban dawa ba dei ban don ka kyndon ba lah ban thep vote tang ki Khasi ha ka KHADC election.