Nongpoh, K’lyngkot 17: Ban sei madan ia ki sap ki phong bapher bapher ki khun samla ka Ri Bhoi District, ka L.S Syiemlieh Production ka la rai ban pynlong biang ia ka Ri Bhoi Super Star, Season-3 ha Ri Bhoi District, kaba long kum ka jingai rynsan ia ki khun samla ba kin sei madan ia kita ki sap ki phong ba la ai kyrpang da u Blei.

Haba kren sha ki lad pathai khubor u Bah Stanwell Manih kum u Organizer ka Ri Bhoi Super Star bad u Bah Lansius Syiemlieh kum u CEO ka L.S Syiemlieh Production, ki la ong ba kane ka jingiakop pynisap na ka bynta ki khun samla ha kane ka Ri Bhoi Super Star, Season-3 ka dei tang na ka bynta kito ki samla ne ki nongshong shnong ka Ri Bhoi District.

Ki la iathuh ruh ba kito kiba kwha ban shim bynta ha kane ka rynsan ia pynisap ki dei ban phah da ka Onlie Audition da kaba kin ring ia ka video kaba 2 minit da ki Mobile ne ki Camera ban sa phah sha u whatsapp number 8787758104 ban bishar na ka bynta ba kin ioh ban rung ban shim bynta ha kane ka Ri Bhoi Super Star.

Kito kiba kwah ban shim bynta ki hap ban phah ruh ia ki EPIC bad lada kim don EPIC ki dei ban phah da ki EPIC jong ki kmie ki kpa bad ryngkat ka Residential Certificate na ki Rangbah Shnong.

Shuh shuh, ki la khot la wer ia baroh ki samla don sap bad kito kiba la heh ka rta ruh ki lah ban shim bynta bad ka thong ba ka L.S Syiemlieh Production ka wan rah ia kane ka Ri Bhoi Super Star, ka dei ban ai rynsan ia kito ki samla don sap ka District ba kin dang lah shuh shuh ban kiew sha kiwei pat ki rynsan lyngba ka L.S Syiemlieh Production.