Guwahati, May 23: Naduh ki bor ba dei peit ka Tnad Forest bad ki paidbah nongshong shnong ki la ia trei lang ban beh kthong noh ia ki kynhun ki Hati kiba wan pynthud sha ki Shnong ha ka thain South Kamrup District, kaba don ha khappud Meghalaya, kaba dei hadien ba uwei u rangbah ha kane ka taiew ba la dep na ka Shnong Rangamati u la duh noh ia la ka jingim na ka jingwan wan hiar thma ka kynhun ki Hati khlaw.
Dei halor kane ka jingduh noh u Rangbah ia la ka jingim, na ka jingshah hiar thma ha ki kynhun ki Hati khlaw, ka tnad Forest na Assam bad ruh ki paidbah nongshong shnong ki la ia snoh kti lang ban beh kthong noh ia kitei ki kynhun ki Hati ban beh syndon sha ki khlaw bah ba don ha khappud ka Meghalaya bad Assam, namar ka jingwan poi kitei ki Hati khlaw ka la pynsyrtok ia ki paidbah nongshnong katei ka thain.
Kane ka jingiamih paidbah ban beh ia ki Hati khlaw ka la sdang ha ka janmiet Sngi Palei, ha kaba ka thong ka long ban beh noh ia kitei ki Hati khlaw na ki jaka shong jaka sah ki nongshong shnong katei ka thain. La ong ruh la bun bun snem mynta, kine ki Hati ki ialeh ban tur beit sha ki jaka ba shong ba sah ki briew, ha kaba la buh jingma ia ki paidbah khamtam hadien ka jinghiar thma ki Hati ia katei ia u rangbah uba la duh noh ia la ka jingim.
Halor kane ka jingkhlad u rangbah na ka jinghiar thma kitei ki Hati khlaw, ki bor ba dei peit ka Kamrup District ki la pynjari da ka hukum sha ki 14 tylli ki shnong ba hap hapo ka Palasbari Circle ba la mana ban iaid ban ieng naduh ka por 3 baje janmiet jong ka sngi Palaei bad haduh 5 baje baje mynstep mynta ka sngi u thohdieng.
Kane ka hukum ba la pynjari ka dei katkum ka Section 163 ka BNSS, 2023, ha kaba la khang pyrshah ia ki paidbah, ki kali paidbah ban iaid ban ieng khnang ban nym mih kino kino ki jingjia ba sngewsih ha kane ka jingiakhun ban beh kthong noh ia ki Hati sha ki khlaw bah.
U MLA ka Palasbari u Hemanga Thakuria, u la ong, ha kine ki khyndiat sngi, ki hati khlaw ki la iaid ruma shi kynhun ha ka thain Palasbari, ha kine ki khyndiat sngi ruh uwei u rangbah na ka shnong Rangamati u la duh ia la ka jingim na ka jinghiar thma ki Hati. Halor kane ka bynta u la dep ruh ban ia kren ne ia thir sha ki bor synshar District ban shim khia na ka bynta ban beh noh ia kitei ki Hati khlaw na ki shnong ba shong basah ki briew. U la kyrpad ruh ia ki nongshong shnong ban ia snoh kti lang bad ki bor synshar District.
Halor kane ka jingjia ba sngewsih na ka jingwan tur ki Hati khlaw sha ki shnong, kiba bun ki paidbah nongshong shnong ki la pynpaw ia ka jingsngewkhia bad kyrpad ruh ia ki bor ba dei peit ka sorkar ba kin ai ia ki lad jingiadap bad ban beh noh ia kitei ki Hati khlaw sha ki khlawbah ban nym buh jingma ia ki paidbah nongshong shnong.
