Nongpoh, Jymmang 21: Hadien shi sngi ba Ki Executive Member ka KHADC ki la kynnoh ba ka bor synshar District na Ri Bhoi kam shym la burom ia ka KHADC halor ka jingkhang ia ka Khyrdop lumpisa ka KHADC ha Umdihar, u Deputy Commissioner ka Ri Bhoi District, u Abhilash Baranwal mynta ka sngi u la pynshai ba ka jingkhang ia katei ka khyrdop ka kHADC ha Umdihar kam dei ba ka bor synshar District kam sym la burom ia ka KHADC, hynrei ka bor synshar District ka khang katkum ki kyndon jong ka aiñ.
Kum ban pynkynmaw, ki 2 ngut ki EM ka KHADC, u Bah Powell Sohkhlet, EM Incharge ka Land, Development and Information & Technology bad u Bah Winston Tony Lyngdoh, EM In-charge ka Trade, Enforcement, Labour Clearance Certificate, and Revenue Collection haba kren sha ki lad pathai khubor hynnin ka sngi, ki la kynnoh ba ka bor synshar District kam shym la burom ia ka KHADC ha kaba ka la shu phah khang tala ia katei ka khydop bad na ka liang u Deputy Commissioner u la pynshai ba kam dei satia kata ka jingbym burom ia ka KHADC kaba la pynkupbor katkum ka Six Scheduled hynrei la khang ia ka khyrdop katkum ki kyndon jong ka ain.
Haba kren had ki Nongthoh khubor mynta ka sngi, u Abhilash Baranwal, Deputy Commissioner ka Ri Bhoi, u la ong ba kam don kano kano ka jingbym burom ia ka KHADC bad ka jingkhang ia ka khyrdop lum pisa ha Umdihar ka dei katkum ka hukum ka sorkar jylla ha u snem 2021 bad la khang ruh katkum ki kyndon jong ka aiñ, ha kaba wat ka KHADC ha katei ka Order ha ka point kaba 6 la thoh shai ba yn nym lah ban pynieng ia ki khyrdop ha ka surokbah National Highway.
Shuh shuh, u la pynshai ruh ba wat ka KHADC bad ka Hima Mylliem ruh ka la ai hukum ban pynieng ia ki khyrdop, ha kiba bun ki jaka, ba ka bor synshar District kam shym la khang namar ba ki hap ha u pud u sam jongki, hynrei ban pynieng pat ia ka khyrdop ha ka surokbah National Highway ne State PWD road ka ain kam shah bad ki hap ban leh katkum ki kyndon jong ka aiñ, u la bynrap.
