Nongpoh, Jymmang 16: Ki bor synshar District ka Ri Bhoi District mynta ka sngi ki la khang khyrdep syndon ia kawei a khyrdop khrong khajna ka Khasi Hills Autonomous District Council (KHADC) kaba la pynieng dang shen ha Umdihar ba hap ha ka surokbah National Highway-6 ha Ri Bhoi District.
Kane ka jingleit khang ka bor synshar district ia katei ka khyrdop ka KHADC ka dei hadien ba ki bor synshar District ki la ioh jingtip ba la pynieng ia katei ka khyrdop harud ka surokbah National Highway-6 ha Umdihar, ha kaba ki la khrong pisa Rs. 200 kawei kawei ka Trok ba kit mar kiba iaid lyngba katei ka Khyrdop.
Halor kane ka jingbuh ia katei ka khyrdop, ki bor synshar District bad ki bor pulit ka Ri Bhoi mynta ka sngi ki la leit ban khang tala syndon ia katei ka khyrdop ba la pynieng beain khlem da ioh jingbit na ka sorkar khamtam ba ka dei ha ka surokbah National Highway-6 ha Ri Bhoi.
Haba ia kren bad u Deputy Commissioner ka Ri Bhoi, u Abhilash Baranwal, u la ong ba ia katei ka khyrdop la leit ban Khangtala noh mynta ka sngi, ka dei hadien ba la ioh jingtip ba la shu pynieng beain da ka KHADC khlem da ioh bor na ki bor kiba dei peit ka sorkar.
U la ong ruh kino kino ki kynhun ne riew shimet kin nym lah ban buh khyrdop khrong khajna ha ki surok highway ne ki surok PWD khlem da ioh bor da ki bor ba dei peit ka sorkar bad dei namar kane ka daw mynta ka sngi la leit khang tala noh ia katei ka khyrdop kaba la pynieng ban lum khajna beain na ki Trok kiba iaid lyngba katei ka khyrdop.
Shuh shuh, u la bynrap ruh ba kum kine ki khyrdop ka bor synshar district kan nym ailad ban pynieng beain ha ki surok paidbah bad kum ka bor synshar district ka hap ban khang tala ia katei ka khyrdop ruh namar ka long beain ban pynieng ia ki khyrdop ha ka surokbah National Highway, u la bynrap.
