Shillong, Jymmang 15: Ubu Taher Mondal, u Myntri ka sorkar jylla ba dei peit ia ka tnad Community & Rural Developemnt (C&RD) mynta ka sngi, u la kular ban shim khia ban ia kren sha u Myntri rangbah ka jylla, u Conrad K. Sangma na ka bynta ka jingdawa ban pynkha sa kawei ka ophis C&RD Block ha Umden Nongtluh ha Ri Bhoi District, kaba dei hadien ba mynta ka sngi la wan ban kynduh ia u da ka Nongtluh Mathan Marmain Development Forum (NMMDF) ba la ialam khmat da u Bah Mayral Born Syiem kum u Nongmihkhmat ka Nongpoh Constituency.
Haba kren sha ki nongthoh Khubor, u A.T Mondal u la ong ruh ba ka sorkar kan sa peit bniah ia kane ka kam ban pynkha ia ki Block, namar na ka liang jong u, u la dep ban ia kren bad u Myntri rangbah ka jylla, sha ka tnad Planning bad ruh sha ka Tnad ba peit ia ka pla tyngka ka sorkar jylla bad dei hanta kan sa poi sha ka jingshim rai.
U la iathuh ruh ba ia kane ka mat ban pynkha ia ka C&RD Block ha Umden Nongtluh, la ju kren na ka por sha ka por ha Ing Dorbar Thaw Ain ka jylla da u MLA ka Nongpoh u Bah Mayral Born Syiem.
U la ong ruh ba ka jingpynkha ia ki C&RD Block ka dei kaba la iaid shakhmat da ka sorkar haba ka la sngew bit bad ka sorkar jylla dang shen ruh ka la pynkha ia kawei ka ophis C&RD Block kaba dei ka Mawhati C&RD Block ha Ri Bhoi District.
La ioh ruh ban ia kren bad u MLA ka Nongpoh hadien ka jingkynduh ia u Myntri ka sorkar, ha kaba u Bah Mayral Born Syiem kum u MLA ka thain u la kular ba un dang buddien ia kane ka jingdawa ban pynkha Block ha Umden Nongtluh knang ba ka sorkar kan pynurlong ia ka jingangnud ki paidbbah bad ruh ban pynsuk shuh shuh ia ki paidbah ha kaba ia dei bad ki kam pynroi lada ioh ia kane ka C&RD Block ha Umden Nongtluh.
U la ong ruh ba kum u Nongmihkhmat na Nongpoh, u la ai khublei kyrpang ruh ia ka Nongtluh Mathan Marmain Development Forum (NMMDF), kaba la shim khia ia kane ka kam bad kaba la ju kyrshan ruh ia u kum u MLA na ka bynta ka jingdonkam ki paidbah ban don noh ka C&RD Block ha Umden Nongtluh ba lyngba kane ka ophis kan ai ka jingshakri ia kiba bun tylli ki shnong ha katei ka thain.
Shuh shuh, u la ong ruh ba u don ka jingkyrmen ba ka sorkar kan shim khia ban pynkha noh ia kane ka ophis C&RD Block ha Umden, namar ha Umling C&RD Block ki la don haduh 250 tylli ki Shnong bad la jin ba mih thymmai sa kawei ha Umden kane kan pynsting bad ban dang lah shuh shuh ban kham ban khia ban pyntreikam ia ki kam pynroi sha ki shnong lada urlong ka Umden Nongtluh C&RD Block ba la angnud da ki paidbah katei ka thain, u la bynrap.
