Nongpoh, Nohprah 19: Ban pdiang da ka mynsiem jong ka jingieit bad ka jingkmen ha ka ban rakhe ia ka Christmas bad snem thymmmai, ka Ri Bhoi Christmas Committee ha ka janmiet jong ka sngi Palei ka la plie paidbah noh ia ka jingpynriam itynnad ia ka sor Nongpoh shi bynta ban pdiang ia kane ka aiom lehkmen kaba don jingmut kumba la rakhe ha satlak ka pyrthei.
Ia kane ka jingpynriam itynnad ia ka sor Nongoh la wan ban plie paidbah da u MLA ka Nongpoh, u Bah Mayral Born Syiem kum u kongsan bad la sakhi lang ruh da ka jingdon lang u Additional Deputy Commissioner ka Ri Bhoi, u Bah M.B Tongper, u President ka Ri Bhoi Christmas Committee u Bah Donald Rymbai, u Bah Plielad Tiewsoh bad kynthup kiwei kiwei ki riew rangbah bad ki paidbah na ka sor Nongpoh.
Kaba kham pher ha kane ka jingplie ia ka jingpynriam itynnad ha sor Nongpoh, ka dei ka shyngoid ba la pyniram itynnad bha bad ba la plie da u Bah Mayral Born Syiem bad ryngkat ki jingrwai bad ki jingkren na ki nongkren bapher bapher kiba la iaroh ia kane ka jingpynriam itynnad ia ka sor Nongpoh, ba ka long kaba don jingmut ha kane ka jinglehkmen ne rakhe ia ka Christmas bad snem thymmai bad khamtam ka Ri Bhoi ka dei ka khyrdop ban rung sha ka jylla ba ki briew kiba nabar kin iaid lyngba kane ka surokbah kaba long shisha ka jingpynkhreh ba don jingmut.
Haba kren ha kane ka janmiet, u Bah Mayral Born Syiem, MLA ka Nongpoh, u la pynpaw shisha ia ka mynsiem jong ka jingkmen ba ka sor Nongpoh ka la phynnai da ki jingpynriam itynnad shwa ban rakhe ia ka Christmas bad snem thymmai bad kine baroh ki urlong ka dei da ka jingshim khia ka Ri Bhoi Christmas Committee bad kiwei kiwei kiba la don bynta ban pynphuh pynphieng khnang ba ka jingpdiang ia ka Christmas bad snem thymmai kan long shisha kaba don jingmut.
U la shim ruh ia ka kabu ban ai khublei Christmas bad snem thymmai sha baroh ki paidbah ka Ri Bhoi bad ha ka jylla hi baroh kawei, da kaba u la ai ka jingkyrkhu kyrdoh ba ka Christmas bad snem thymmai kan long shisha ka jingkyrkhu ia baroh ki longïing longsem bad ba ngin dang lah ban kiew shaphrang ha baroh ki liang jong ka jingim.
Shuh shuh, u la kyntu ruh ba ngi dei ban don ia kata ka mynsiem jong ka jingkitkhlieh lang ban wan rah ia ka bha ka miat bad ka roi ka par ha ka imlang ka sahlang bad lada don kata ka jingiatylli bad ka jingiakitkhlieh lang ngin lah shisha ban kyntiew ia ka dong bad ka thain ha baroh ki liang jong ka jingim, u la bynrap.
