Kum ka dak ban pynpaw ia ka jingkynmaw burom ia ka lyngkhuh sngiiap ba 189 u Syiem Tirot Sing, ki kynhun sengbhalang kiba don ha Ri Bhoi, kiba kynthup naduh ia ka KSU, HNYF, HANM, RBPC, lem bad kiwei kiwei, mynta ka sngi ki la leit buh syntiew ki skud ha u Mot sahkynmaw u Syiem Tirot Sing, uba don ha phyllaw ka skul Jawahar Navodaya Vidyalaya, Niangbari.
Haba ki nongialam jong ki seng bapher bapher ki ai jingkren, ki la pynpaw ba kum ka jaidbynriew ka dang donkam ia shibun samla ki ba don ia ka mynsiem shynrang bad ka mynsiem len lade kumba long u Syiem Tirot Sing, na ka bynta ka dawbah jong ka jaidbynriew ki ban mih shakhmat ban shakri ia ka imlang ka sahlang.
Ha kane ka sngi, la iashimbynta ruh da ki nonghikai lem bad ki khynnah skul ka JNV.
