Nongpoh, Iaïong 14: Ka seng Ri Bhoi Youth Welfare Organization (RBYWO) ka la mih shakhmat ban pynpaw ia ka jingpyrshah kaba jur halor ka jingthmu ka sorkar ban thied ia ka jaka na ka bynta ka jaka shong ka jaka sah ki shipai CIFS ha ka thaiñ Umroi.
Kumba la pynpaw da u Working President u Bah Apbor Nongrum, la ong ba ka seng Ri Bhoi Youth Welfare Organisation (RBYWO) ka la mih ban ieng pyrshah ia kane ka jingthmu thied jaka, ka dei hadien ba la pynmih ia ka ‘Public Notice Expression of Interest for Sale of Land for CISF Family Accommodation’ kaba dei katkum ka tarik, dated Nongpoh, the 8th April 2025 ha ki lad pathai khubor lyngba ka ophis u Deputy Commissioner Ri Bhoi District, Nongpoh.
La ong ruh ba ka ophis u Assistant Commandant/CASO, CISF, Shillong Airport bad ryngkat ka jingiatreilang bad ka Sorkar Jylla ka thmu ban shim jaka na ka bynta ban shna ki jaka sah kine ki shipai CISF ha ka thaiñ Umroi. U la ong ruh ha ka jingshisha baroh shi katta kine ki shipai CISF ki sah beit hapoh ka Umroi Airport, hynrei mynta kala wad ia ka jaka laka jong bad kaba jngai la kumno kumno kumba 5 ne 10 kilo meters na Airport.
U la ong ruh ba ka seng ka sngew dei ban pyrshah jur ia kane ka jigthmu thied jaka ia ki shipai CISF ba bunsien ki paidbah ki mad jingeh hadien habud kumba la jia ha Nongsder bad u la pynpaw ruh da kaba ong, hooid tang ban ioh ia ka jaka kin kular iaka bneng ka khyndew hynrei dei pat ban kynmaw ia ki por ba la leit noh ba k paidbah ki kynduh jingeh na ka jingdon ki shipai la ka long ha kano kano ka jaka ha ka jylla.
U la bynrap ruh da kaba ong, ba ka seng ka sngew dei ban kyntu nyngkong iaki nongshong shnong kiba don jaka ha kine ki thain ba kin nym buh ia ka pisa hakhmat bad ban nym thep kyrteng iaki jaka jongki na ka bynta ban aiti sha ki shipai, namar ka jingeh kala ap lypa. Kaba ar ka seng ka kyntu ruh iaki Dorbar shnong ka thain Umroi, ki Syiem Raid ba kim dei ban ai NOC sha ki briew ba tyrwa iaki jaka jongki sha ki shipai CISF lyngba ka ophis u Deputy Commissioner, u la ong.
Shuh shuh, u la ong ruh ba ka seng ka la kyntu iaka Sorkar jylla ban thaw lad thaw lynti kumno ban ai kam iaki samla bala pyndep iaki training Security na ki Registered Training Institute ban ioh kam hapoh kane ka airport ban long kum kata ka lad ioh kam naka bynta ki samla ka jylla bad ym ban ai jaka sha kita ki shipai CISF, u la bynrap.
